Moatjes ien e poletiek
Geert Moatjes zit ien e schaar van de grote kestanje, achter ien e tuun. Hij kan metdraaien, met de wiezers van de klok, en hij kan de klep van zien pet wat sekuurder antizun zetten. Zo komt e de onverwachtse hittegolf ien april wel deur. Noast m op e grond stijt t theebred met n glas wotter en de kraant van guster. Harmke, zien vrouw, het m op t hart drukt gien pils te drinken bij t lezen van de kraant. “Bij t consumeren van t doageliekse nijs moet je nuchter blieven, t nijs zölf is al zat!” is heur stelling. Geert is gien snelle lezer, doarum leit e voak n poar doagen achter. Zo kan e wat nijs nuumd wordt (Alphen aan de Rijn, Baflo, minder Meerstad en JC) nog ies herkauwen, is ok beter veur de spijsvertering. Zien stoelgang is doch al niet zunder knelpunten en as e deur TV, krant en Haarm Proatjeboksem in ien keer bijproat wordt, kan e wel op e pot zitten blieven. Noa elke pagina nemt e n slokje wotter, leit de krant op e stenen noast zuk en kraabt zuk even achter de oren.
“t Is toch wat…”, mompelt e, kriegt dan n dreumerge blik ien e ogen en dwoalt vot noar de “plek des onheils”. Dan lopt e zo mor zölf ien t winkelcentrum van Alphen, zigt ieniens n rastakop ien Baflo of voart bootje bij n landhuus ien Meerstad. Asmits zit e zölfs ien e Arena, vergoadern met de ledenroad van Ajax. Ieder bod as hij zien mond open doen wil om t verlözzende woord te spreken, is Cruyff höm veur. Dan mor de pet weer rechtzet, de volgende pagina derbij, zit e binnen de körtste keren ien Libye of Bahrein. Nou, met dizze stoefmoand april kan e zuk wel n beetje veurstellen hoe t doar ien e woestijn wezen zal. Dat die lu dan nog energie hebben om mekoar te bevechten, t zwit lopt je ja zo al van e kop of, ien stroaltjes… t Is aans wel wat met dit nije kabbenet, denkt Geert. En aal die mooie proatjes van Rutte & Co… As je vrijdags kieken noar t gesprek met de minister-president en je kniepen je ogen wat dicht, verdold, dan begunt die Rutte woarachteg al as twee druppels wotter te lieken op zien veurganger Balkenende. Mooi proatje zus, schiere babbel zo, mor de lu ien e socioale waarkploatsen bennen de pineut, veur de soldoaten die noar Afghanistan goan blift der niet iens n geweer over om ien e lucht te schieten en de grui van de plietsie is net genoeg om de lu op e Ofsluutdiek te bekeuren die 130 n snelheid vienden veur zoezen en zemeltoeten. En aal dat gedoe met die Wilders en zien toneelmeester Moskowicz, dat is doch ok allenneg mor bedoeld veur de Telegraafbühne….. Woar is de tied bleven van Joop en zien “twee dingen” en die lutje admiroal Piet de Jong die ze n stoof onner zien voeten schoven, aans kon e niet over de vergoadertoavel ien e kabbenetsruumte hènkieken… En nou heb je die Bleker weer met zien grode agrarische mond. Hebben ze bij t CDA op t peerd tild en dat vindt die Grunneger nou zo spannend dat e ten koste van hiel wat noatuur op dat peerd zitten blieven wil… En dat mag wel, zeggen die gedogende PVV’ers, zo lang as jim dat peerd niet achter onze woagen spant en zo lang as jim sekuur doet wat wij souffleren…. Gien Haringvlietdeur op n kier, de Ecologische Hoofdstructuur blift n goatenkees en die 100 miljoen veur die tweede JSF, nou toe dan mor, ok al bennen we t doar niet met eens! En neem nou die pronkeboon van n Verhoagen, komt rusteg met n nij kerncentroaleveurstel asdat der ien Japan niks aan t handje is… “Joa, mor dat overkomt ons vanzulf niet…” Wat n arrogantie! Geert dreumt al weer noar d’aandere kaant van e wereld en zigt ien Japan n huzenhoge golf op zuk ofkommen. Hij doet ofwerend n aarm omhoog en zet zuk schoor tegen de kestanje.
Dan heurt e de stem van Harmke: “Wat is jim nou aan t oefenen? Is der n stee vrij bij de teneelclub? Die kestanje die kriegt jim doch niet onnersteboven…..!” Geert loat zuk weer deel zakken op e stoel en pakt zien glas wotter. Ok dat nog, léég….
