Midwinter

· Velde van de, Age

Midwinter ien mien kienerjoaren
k Wait nog goud hou t was
t Waren mooiste doagen van t joar
Thoes ien koamer n kerstboom
Dij wel drij meter was
Mit echte keerskes, balen en engelnhoar

Mit lutje zus hail vroug ien mörn
Snijkerel moaken ien toen
Hai druig op kop, pa zien swaarde houd
n Woddel was zien neuze
Haar n bezzem zo as t heurt
Wie trots vanzulf, t ston hom ja zo goud

Midwintertied veur jong en old
Binnen doagen woar elkenain van holdt
Snij bedekt t laand mit n loakenwit klaid
Sleekeschoeven, scheuveln op knoal
Snijbaaljen ien winterkôl
Doagen van laifde, vree, verdroagzoamhaid.

Moeke mit heur kerstverhoal
Ze kon t haildal oet kop
Vol aandachg lustern noar heur waarme stem
Over n Keunek, geboren hier hail ver vandoan
Ien n staal, in t dörpke Bethlehem

As pa t op heupen kreeg
Speulde hai zien deuntje mit
Mondörgel van hom kwam din oet kaast
Mit ogen dicht speulde hai “Ere zij God”
Soamen zongen we t verske “Stille Nacht”

Midwintertied veur jong en old
Binnen doagen woar elk en ain van holdt
Snij bedekt t laand mit n loakenwit klaid
Sleekeschoeven, scheuveln op knoal
Snijbaaljen ien winterkôl
Doagen van laifde, vree, verdroagzoamhaid.

Dat is woar t mit Midwinter om gaait.

Ook op meziek zet deur de schriever zulf

• Facebook
• X
• LinkedIn
• Email
• Print

Gedichten

Meer van t zulfde:

• Taande Jaantje

• Veujoarszun

• Meschain

Achtergrond info:

Geboren: 1955
Woont in: Stad
Schrift al: sunt 1996

Schrift en zingt in t Grunnegs, hai dee mit aan: “Tuutjefloitersfestival”, “Oafslag Noord Twij” en “De Nacht van Ede”.

Schrift al: sunt 1996

Age over Age: Ik bin geboren en opgruid in Stad.
k Hol mie sunt 1996 bezeg mit het schrieven van laidteksten in de Grunneger toal.
In t veujoar van 1996 ben ik begonnen mit het schrieven van twij laidteksten veur het Grunneger Laidjesfestival.
Doarop kreeg ik veul positieve reakties, o.a. van RTV-Noord dij mie nuigt hebben in n poar van heur programma’s.
In december 1996 kwam mien eerste spaigelploatje “Onderwegens” oet. In meert 1998 mien twijde “De tied ontvlucht” en in meert 2000 mien daarde “Zo mor n dag”, woar o.a. Wia Buze, Fransien Kuiper en Alex Staal aan mitwaarkt hebben.
Teksten en meziek schrief ikzulf.
Hoogtepunten tot op heden is het mitdoun aan het “Tuutjefloitersfestival”, “Oafslag Noord Twij” en “De Nacht van Ede” (de leste twij organiseerd deur RTV-Noord).
Mien laidjes binnen regelmoateg op Radio-Noord te beluustern.
Sunt 1998 heb ik mie ook toulegd op het schrieven van körde gedichten.
Ik bin op dit moment bezeg mit opnoames veur mien vaarde CD (noajoar 2002) en mit het moaken van mien aigen Web-Site.