Levensloop

Zaalvepootjes, klountjes goaren
Wattendotjes, pasgeboren.
Noavelbaandjes, waskelapkes,
Ledikantje, eerste stapkes.
Opstoan, zomor valen,
Sloapen goan. Eten van twei walen.

Klaaine peuter, koedelom,
Laif geleuter, baintjes krom.
Peuterzoal, veur ‘t eerst van hoes,
Brabbeltoal, snoezepoes.
Kleuterklas, bie juf op schoot,
In dien sas, doe bist al groot.

Taiken, schrieven,
Oardriekskunde, zitten blieven.
Sommen moaken, ook nait mis
Vliet, gedrag, geschiedenis.
Mavo, Havo, peuleschil,
VWO, zitst nait stil.

Rozeknoppen, moanestroalen.
Haartekloppen, vriendje hoalen.
Haalf verdoofd, geaarmd lopen,
Snel verloofd, ringen kopen.
Geld verdainen, traauwen,
Miet zien baaiden, nuske baauwen.

Boakerproatjes mit mekoar,
Geboortekoartjes ooievoar.
Volop leven, groot geluk,
Laifde geven ken nait stuk.
Hoeske schoon, broekgedientjes,
Hail gewoon, klaaine pientjes.

Brille droagen, vaals gebit,
Nait meer vroagen, hou het zit.
‘t Leven gaait, ‘t was prachtig
Veur doe ‘t waitst, bist tachtig.
Spul verkopen, stain wordt groet,
Op krukken lopen, bejoardenhoes.

Rimpelhoedje, hoaren gries,
In een knoetje, levenswies.
Trillende leden, baintjes krom,
Tied vergleden, olderdom.
Niks meer zain, ziedperron,
Loatste traain, endstation.

Eerste pries 29ste Westerwolder Schriefwedstried 2024