Kneusde proemen
Wat is het toch mooi weer vandaag En lekker in de lucht.
Zo sprak een man al tot zijn vrouw.
Wij gaan de stad ontvlucht.
Dat zong mien pa altied. t Is nou ook zunschienend weer. Wel felle buien. Schane om thoes te zitten. t Hoes is aan kaant. Schone loakens op ber. Was hangt onder t òfdakje. Leste snoeiholt zit ien gruine bak. Pad is aanveegd. Ik pak fiets en dou mien riegke ‘things to do’. Dwaars deur t sentrum van Stad, deur Noorderplantsoen ien haarfstkleuren weerom en op A-weg paas ik korte jentege steveltjes. Pries schrikt mie òf. Mörn beslizzen. Nog even noar gruinteboer. Dij het Roemeense proemen. Jam moaken. Is geleisukker ook op? Hai staait zulf ien winkel en prat mie bie over nije abbelsoorten. Ik kais gonnent oet. Hou onthol ik noam. Denk aan Vloamse dichter, zegt hai.
Gaauw noar hoes veur n kop thee. Mit fiets aan haand loop ik over riep noar weg bie oprit noar t winkelsentrum. Auto dij doarhìn wil, staait stil. Hij mout mie veurrang geven. Ik stap op. Woagen begunt te rieden. Hai kin achter mie laangs. Din heur ik dat bestuurder gas geft om verkeersdruppel te nemen. Verrek, hai stopt nait. Ik perbaaier vot te kommen. Hai het mie al te pakken. Ik knal veurover mit kop op stainen. t Wordt swaart.
Stemmen. Wied vot, dìn dichterbie. “Ze zegt niks as k wat vroag. t Was heur schuld nait. Heuren joe mie? Hou haiten joe? k Heb heur nait zain. t Was nait mien bedoulen om n ongeluk te moaken.” Natuurlijk nait. As t wel zo was, mozzen ze hom ien t hok stoppen. k Wil haand bewegen. Aarms liggen roar onner mie. Bril ligt 30 cm verder. n Jong stel zit op t houkje bie mie. t Wichtje het 112 beld. k Vroag of ze dochter op Meziekschoul woarschaauwen wil. “Doun we straks”, zegt ze. Woarom nou nait? Ik vroag weer en zeg t nummer. Ze belt. Jong vragt hou of k hait. Dat vertel ik hom. En wat veur dag of t is. Wat kin mie dat nou schelen… Hij wil t doch waiten. Vrijdag. t Joar din? 2008. Doatem? 15e het al west, mit leste lezen van Kader Abdolah. 20e is t nog nait. Dat is holdboarhaidsdag op ain van bosschoppen. k Vien zulf dat t redelk rationeel redenaaierd is. Zai binnen der nait blied mit. Kuzzen wordt mie onner kop schoven. Zol dat gruinteboer wezen? Sirene. Zaikenwoagen. Veur mie. k Bedank t jonge stel en zeg derbie dat ambulancepersoneel vervast alles van heur overnimt en dat ze der meschain beteuderd bie stoan.
Nije stemmen.
“Wel waas der bie? Zag je t gebeuren? Het ze vot west? Was ze lopend?”
Jongkerel vertelt dat ik eerst niks zee, dat ik wel wis dat t vrijdag was en welk joar, mor nait dat t de 17e is. Aha, 17e. Vasthollen. k Lig nog aal veurover en krieg een aludeken over. Lekker waarm. Bloud wordt stelpt. Weer n sirene. Plietsie. Agent zegt: hier is uw kleinzoon. Ik zai hom en nuim zien noam. Vroag woar fiets is. Dij mout liggen blieven. Agent taikent er n streep om tou. Hai taikent gain streep om mie tou. Ze leggen mie op brancard en schoeven mie ien auto. Dochter komt deraan. Ze gaait noast chauffeur zitten. t Spul ridt vot. Verpleger vragt noar mien noam. Tou din mor. Wat veur dag of t is. 17 oktober 2008. Ho, nait al te triomfantelk. Hai radt mie aan om rusteg liggen te goan. Der staait mie hail wat te wachten. Dat klopt. Behandelkoamer. Dokter zegt: “Thorax is OK”. Watding? Hai legt oet. Röntgenfoto. CT-scan. Thoraxdokter ien traumakoamer vragt en krigt anatomisch pincet. Oordailt din: “diepe vleeswond in het hoofd, ik ga eerst verdoven”. Hij jagt mie 4 pieltjes ien kop en zet drij krammen. Dochter het mie haand geven. Zai knipt haarder as ik.
Weerom ien behandelkoamer mouten wie wachten. Der is wat slimmers gebeurd. Tot zowied binnen wie hier vakkundeg holpen. Toch ook wat dom volk. Gainain kin onthollen wat veur dag of t is….. Dat heb ik heur wel 20 keer verteld. Zuster vragt dochter: “heeft mevrouw al gehuild?” Nee, zegt t wicht. Verwachtensvol kieken ze mie aan. Ja, kom even…. k Dou mien best om zo kaalm meugelk te blieven bie wat er gebeurt. As der liept worden mout, doun ze dat zulf mor. Zuster ‘scoort’ n kop soep veur
ons. Dat vaalt der lekker ien. Pepierboudel is kloar mit wekschema veur hazzenschudden. Nije vroag: woont U alleen? As dochter blift, mag k noar hoes tou. t Aarme kiend mout mie om de twij uur wakker moaken. Schoonzeun hoalt ons op. t Is oavend. s Mirregs is hai laangs plek kommen, dou grootste commotie veurbie was. Der laag wel n grode plas bloud op weg. Harregat, wel zol dat west hemmen? Ik dus.
Wie komen ien hoes. Zeun komt te kieken. Der glidt n meewoareg laagje over zien gezicht. “t Is goud òflopen,” zeg ik. “Gelukkeg mor,” zegt hai. Ik stap ien ber mit schone loakens. Net of ik mit dat gehaaister van vanmörn vuilde dat er wat gebeuren zol. k Heur waarme stem van man oet dörp dij mie oppakte dou ik as kiend op SunneMeerten aanreden wer: “Hes die zeer doan, laive?” Ondanks paramollodinges bin k kloar wakker. Haile film trekt veurbie. Noorderplantsoen ien geel en oranje. Steveltjes. Rubensabbels binnen hail bleven. Proemen binnen kneusd. Bril mit bloud zai k ien close-up: linkerglaas ien diggels, rechter dof òfschuurd, staang mit roare knik omhoog.
k Heb vandoag gain thee had.
21/22 oktober, 2008
