Kerst- en Nijjoarskoarten, Moatjes-misère

Geert Moatjes zit met e hannen ien t hoar! Nou ja, hij het zien hannen op e toavel liggen, mor ien zien kop is t n drukte van belang. Veur hem op e toavel ligt n stoapeltje Kerst- en Nijjoarskoarten, van e HEMA ducht m, of van t Tuunsentrum, doar bennen ze ok niet zo priezeg. t Adresboekje leit dernoast, met n pen die Geert n moal kregen het van Melis, veur ‘bewezen diensten’. Harmke, Geert zien vrouw, het doar ok n blad pepier bij deponeerd, doar moet e de noamen op zetten van de lu, woar e n koart veur schreven het. Dan kommen der ja gien dubbele bij die lu ien e postbus, dat is ok ja niet de bedoeling.
Geert het ien tied al drie koarten schreven en de noamen met zien wat trillerg, mor wel dudelk haandschrift op t Harmkepepier zet. En nou het e pauze en zit e ien gedachten verzonken, met e hannen op toavel, mor ok ien t hoar. Hij zigt die hiele koartjesschrieverij niet meer zitten, hij begunt der zelfs n hekel aan te kriegen.
“Woarom moet hij dit ok doen, woarom doet ze dat zulf niet?” Met ‘ze’ bedoelt Geert zien vrouw Harmke. Ze wiet ja dat hij laang niet zo “schoon” schrift as zijzulf, zij haar vroeger n dikke acht op dat schrieven, hij n hiel moager zesje. En wat heb je deraan aan aal die schrieverij? Allenneg mor die TNT- boazen op t spek binden, en je wieten niet iens of de koarten dit joar wel ien e brievenbuzzen stopt worden deur die postbodes met die stupide oranje kleur op heur kleren. (Doar haar e ok al hikhakkerij over had, met Harmke: “Geert, dat bennen gien postbodes meer, dat bennen postbestellers, goa nou ok es met dien tied met!”) Postbestellers…. Joa, dizze post haren ze wis en vast bij Harmke besteld en hij kon der zuk op uutleven… Wat was de volgende ok al weer? O ja, de familie Drent-Drenth, das ien koart veur vief personen. Nog mor goed ok dat e niet veur aal die vief Drenten ofzunderlieke koarten schrieven huft, net of e therapeutisch bezeg is ien dizze witte decembermoand. En doe der mor denken om, strakkies komt Harmke thuus en krigt hij de boodschap: “Och Geert, wil jim dizze koarten even op e bus doen?” Of: “Och Geert, ik heb gien specioale zegels meer, kan jim niet even op e olle fiets noar Zuudhörn jakkern?” Wel de slemiel is ien dit verhoal, dat is wel dudelk!
Geert kiekt even op e klok aan e muur, nog gien twaalf uur, zit vandoag ok gien bewegen ien, ien die wiezers. De tied wil mor niet om…. Hij stìnt mor es goed en bölkt zo haard dat de buren hem wel heuren kunnen. Zo, dat lucht op. Geert pakt zien Parker op en knipt wat met e drukknop, Harmke is der nou ja doch niet….
“Woarom sturen ze eigelks koarten noar lu die hier nog gien vief huzen vandoan ien e zulfde stroat wonen? Wat is dat veur ‘verwording’? Komt Harmke dammeet thuus en zegt ze: “Jim het de buren doch niet vergeten, hè!!!” En kan hij zo doadelk de klompen aantrekken en zien leven woagen op die glibberge onnergrond om die koartjes ien e buzzen te proppen. En dan komt e vanzulf ien van die Drenten tegen en die wil wel n proatje moaken, mor ja, doar het hij gien tied veur, hij moet as n beunhoas ien e benen om die stomme….. En wat moet e dan tegen die Drent zeggen? “Moi Drent, mooi dat k je zie, mor k heb even gien tied, ik moet noamelk n nijjoarskoart bij jim ien e greune brievenbus vallen loaten….” Geert heurt ien e gang n bult lewaai, der rommelt hiel wat op e deurmat. Geert pakt zuk op en sloft noar de veurdeur. O, hij zigt t al, doar bennen hiel wat koarten bij. Op t moment dat e de stoapel post oppakken wil en zuk even n steuntje verschaft aan e veurdeur, heurt e dat de deurkruk wordt omdraaid, de deur gijt open. Gelukkeg kan Geert zuk nog net stoande holden, Harmke kiekt m aan met n poar ogen die zeggen: “Het jim bij de jeneverfles zeten?” Zien vrouw komt gauw de gang ien en smakt de deur dicht, Geert het net op tied zien vingers terugtrokken van de deurposten.
“Moatjes, wat is t verdold kold! Gijt jim temet even noar Zuudhörn om nog wat biezundere zegels op te hoalen? Ze bennen op en buurvrouw is der ok deur. En dan kun je doarnoa nog wel even die koarten hier ien Noordhörn bezörgen, dat spoart n TNT-besteller uut… En jim het de buren doch niet vergeten, hè!!!”