Jong dij aan swimmen ging
(n foabel van Aesopus)
n Kwoajong was aan swimmen goan ien n woeste revier, mor swimmen kon jong nait. Zunder hulp kon e nait te wotter oet kommen en doarom raip e om hulp. Der kwam n kerel op òf, mor ien stee dat kerel jong hielp, begon e tegen jong te schelden dat hai nait wies was om swimmen te goan en dat revier doar veuls te gevoarlek veur was. Dat mos jong echt nooit weer doun. En zo ging t mor deur. ‘Och man,’ raip jong dou vanoet t wotter, ’help mie toch eerst en schel mie loater mor oet.’
Goie road zunder hulp het gain zin.
