Is der hoop?

Zwaarvend noar n vaaileg bestoan,
hebben ze n stoere weg te goan.
Vot van ale ellèn en oorlogsgeweld,
overleven is t ainegste wat nog telt.

Hou bestaait t dat aigen volk zok zo min kin verstoan,
mekoar verjoagen, joa zowoar noar t leven stoan.
Of: “voert Allah ze oet duustern noar t licht” , (Koran: 2. 257)
mout t mensdom doarveur zo worden ontwricht.

Mekoar bestrieden dat het toch gain zin,
en mekoar verjoagen aal net zo min.
En dat allain deur vastrouste aigen woarhaid,
nait vrij te wezen te zuiken noar gezoamelkhaid.

Geleuf is toch ‘vertraauwen hebben in’ heb ik leerd,
of is t ‘macht hebben over’, dij hier regeert.
Het men din bosschop sums verkeerd verstoan,
eertieds optaikend oet Mohammeds noam.

En intied zitten wie mit veul ontheemden,
op zuik noar rust in verschaidende vremden.
Loaten wie ze dat geven, zunder weerzin,
as veurbeeld dat ‘soamenleven’ ook aans kin.