Invoazie

Gevolg van de klemoatopwaarmen: de tropische grode faraomier het Nederland beriekt. Dizze mieghommel vreet in kompjoeters en ICT-sestemen droaden en zirkwiets an. n Uutwazene faraomier is om en bie ain zentemeter laange, hai biet gevoarlek, is bestand teugen bestriedensmiddeln.
In Drouwenermond is n volk faraomieren sinjaleerd. t Reugt zok in n streveg marstempo richten t Knoal. De Vaaileghaidsregio wil veurkommen dat t mierenvolk t Knoal overstekt. Ale broggen stoan open, bie de sluzen plougjes vraiwillegers mit roetbraanders.
t Is al donker as t legioen ankomt bie d’open Drouwenerbrogge. An de laandskaande van t Knoal dromt t bienander. Oarzeln wuilt deur t mieghommelvolk. Mor gaauw komt heur orgenezoatsie in gaang. n Riege mieren droagt dreuge haarstbloadern an. Dij leggen zie op t wotter en zie goan der op zitten. Mit heur poden peddeln zie langzoam noar de stadskaande.
Schrik bie de roetbraanders. Dij ontdekken dat zie heur laangs de haile stadskaande verspraaiden mouten. Want dij faraomieren op heur haarstbloadjes landen alderwegens. Ainmoal an d’overkaande kroepen zie weg, worden onvindboar. Buutslaampen zwiepen iedeljipsk hin en weer. Roetbraanders schruien der op lös, meer op roakeldais as dat zie mieghommels zain.
Anderdoagsmörgens. “Kiek moeke, wat n grode mieghommels.” Jaimie staait mit zien moeke op t Hemenplaain. Moeke trekt hom weg: “Nait anroaken, dij bieten.” Bie d’Aldi legt t kassasesteem al plat. Mit de rekenmesien op heur tillefoon zit de kazzjere t totoalbedrag uut te reken. En zie kinnen bosschoppen enkeld kontant betoalen.
Thuus in de Kempenloane zugt Jaimie zien pabbe. Dij komt van t stadsketoor. Ok doar lagen ale kompjoeters plat. Normoal zeggen de metwaarkers doar dat d’òfhandeln vertroagd is deur drokte, zaikte, vekaanzie of deur d’ingewikkelde prozedures. Vandoage kriegt de faraomier de schuld van alens.
Jaimie pakt zien spelkompjoeter. Mor dij dut niks meer. Den mor n laidje òfspeulen van André Hazes, zien faveriete zanger. ‘n Bietje verlaifd’ schaalt deur de koamer. Verboasd zugt Jaimie opins mieghommels uut d’apperoaten pielken. Versteurd, angsteg en in verwarren runnen dij vot.
Hai zegt t an zien ollu. “Dou nog es zuk n laidje van dij André Hazes.” ‘Bloud, swait en troanen’ op topvolume. Nog meer wegrunnende mieren. De buren bomzen op de mure, bellen grèl an: “Kin t wat zaachter!” Zien ollu duden uut, de buren droaien om, goan dat ok perbaaiern.
As n eulieflek verspraaidt zok t gerucht deur t Knoal. Dij mieren kriegst vot mit André Hazes. Alderwegens schaalen noe zien laidjes deur de stroaden. Alderwegens hordes faraomieren op de vlocht.
Der volgt n drokke tied veur de repereteurs en de kompjoeterhandel. Alens mout vannijs insteleerd worden mor t komt goud. De kazzas bie d’Aldi lopen weer as n traain. Op t stadsketoor verdwient de faraomier langzoam as excuus veur de vertroagens. En de laidjes van André Hazes bennen nait an te slepen.
Faraomieren? Dij zain wie heer nait meer.