Ploage

Gainain wait hou dat komt, dij moezenploage in Hoagenbuurt. Dij bennen overaal, zai kommen teveurschain of verdwienen in heur gaangen under grond. Zai kinnen moezenknipen, zai lopen doar mit n wiede boge omhin. Moezengif loaten dij leggen en as aargens zuk ain apperoatje stoat mit ultrasoon geluud dat dij nait verdroagen, dan knoagen zai snouer deur. Kadde dij achter ain moes an joagt beloagen zai mit twinneg. Piepend en bietend storten zai zok op hom. Kadde goat den doch mor op vlocht.
In huzen vreten moezen alles an. Olde manskerel op Olmenhoage haar te veul zoept en sloapt op sofa zain roes uut. Anderdaagsmorgens ondekt hai dat zai zienn aine oor anvreten haren. Moekes in paniek zain moezen in waige over heur sloapende baby hin runnen. Aal wat eetboar is vreten dij an. Verpakken kepot knoagt. Moezenkeudel omhin.
Wiekroad is nait in Hoagenbuurt. Mor neud bringt bewoners bienander. Mout wat beuren. Veul meer as bloots bekinde tips en wenken dij gemainte Knoal angift. Dizze moezen bennen nait normoal, zai bennen agressief, sloan terog.
Borgerwoakers goan uut mit batsen en zwoare stevels. Moezen dood trappen en heur tunnels vergroaven. Van Sparrenhoage tou Platanenhoage verkleuven dij grond en trappen moezen dood. Achter heur rugge kommen altied nije moezen weerom oet altied nije tunnels.
Borgerwoakers holden beroad, steken koppen bienander. Mor zai waiten t nait meer. En moezen bliven allieke veul noareghaid ofgeven.
An Eikenhoage wonen twai olde wiefkes. Lu vinden heur bietje roar en mainsttied sloat gainain acht op wat dij zeggen. Zai geleuven in bovennetuurleke zoaken, in reinkarnoatsie. Mor noe wait gainain nog road. Zai vroagen baaide of dij meschain oplossen waiten.
Wiefkes nikken, prakkezaaiern. Zai zain zoaken an. Reinkarnoatsie: lu kennen in veurig levent zulf moes west zain of in toukommend levent moes worden. Dus respekt veur moezen, respekt veur aal wat leeft. Nait dood trappen mit dij zwoare stevels. Borgerwoakers kieken bietje befoezeld.
De wiefkes haren nog meer. Kiek mor ains deur ogen van zok ain moes. Zok ain mens is den reuzen groot. En zain stevels binnen moordwoapens. Hou kommen lu dus in kontakt mit moezen? Wiefkes doun veur. Zai doun schouen uut, leggen zok plat op grond. Zo en mit gezichte op moesheugte mout dudelk zain dat zai gain kwoade bedoulen haren.
Elkenain holt zok stille, wiefkes konsentreren zok, perbaaiern in kommenekoatsie te kommen mit moezen. t Rekt lieke, mor den verschaint eerste moes. Gaauw volgen meer. Tounoaderen begunt. En moezen stokken uut.
Dij kunnen zok wol indenken dat buurt perblemen vuilt mit heur. Mor lu mouten begripen: wie zitten vangen in Hoagenbuurt en wie bennen mit veul te veul. Om wiek hin al dij autowegen. Dij oversteken is veur n moes levensgevoarlek. Wie haren dus mor beste doaruut maakt en us organeseerd. Van noatuur bennen wie baange en vlochten vot. Mor aal moes hier het weerboarhaidstrainen had. Wie sloan terog en wie overleven in ons gaangenstelsel.
d Olde wiefkes geven verslag. Borgerwoakers zain vlog kloar. Apmoal doun dij heur zwoare stevels uut en reflekterende gele hesjes an. Mit blote vouten muiten zai verkeer up op Atlantisloan en Amerikaloan. Maank komt vailege corridor veur overstekende moezen. Blide verspraiden dij zok in Plan ter Maars en Vogelbuurt. Moezenploage in Hoagenbuurt is veurbie.