Hitte protocol
k Bin al n mooi zetje bezeg n lieske te moaken veur loater.
Reden is redelk egoïstisch, mor veur zovèr ik t nou bekieken kin, nait overbodeg. Kist wel noar t verleden blieven kieken, n aangenoam leven budt, ook al hebben wie doaglieks zicht op ‘Toukomst’, gain garantie veur n zörgeloze toukomst. En omdat ik nait in n donker gat valen wil, dou’k aan zulfbeschaarmen.
Dus moak ik n lieske mit wìnsen, n verlanglieske.
Nee, nait op n computer, mor gewoon op n stokje pepier. n Dubbelvolden A-viefke, dat persies in mien porrefullie paast. Tegen t haart aan. Veur loater, ast bewegensapperoat meschain wat hoapert en gedachten over aigen wel en wee nait meer zo vloeiboar over tonge noar boeten stromen.
Dit soort kopschraberij komt netuurlek nait oet locht valen. Soms beurt t onder t eten, dat ik even wegmout omdat mie wat in zin schoten is. t Kin net zo goud midden in de nacht wezen, dat ik wat aan t pepier touvertraauwen mout, mor omdat ik leste tied nog wel ais wat vergeetachteg bin, blift t pepiertje soms ook wekenlaank ongebruukt. Bie de leste hittegolf in juni was t persies aansom.
t Hailege vuur om op n vailege, vertraauwde menaaier noar toukomst tou te leven, wuir nog ais ekstroa aanwakkerd deur n stok in kraant:
‘Op haite doagen staarven veul oldere mìnsen.’
Wat ik leste joaren regelmoateg dou, mit n rooie buusdouk op kop lopen, ook omreden dat ik baange bin dat mie d’hazzens waik worden, het tot nog tou gain bewezen effect. Zunnestroalen binnen onverbiddelk. Mor pas noadat ik soavends in t nijs lu heurde over oplopende temperaturen in hoes, soms tot wel 30 groaden, kreeg k toch zo’n meedlieden mit dij olden van doagen, opsloten in snikhaite (verzörgens)hoezen, zunder n zuchtje frizze locht, dat ik docht:
‘k Bin mit mien persoonlek lieske in elk geval wel op de goie weg.’
t Besef, dat sukses doarmit nait verzekerd is, mag helder en dudelk wezen, mor t was wel t begun van n nij sjapieter:
‘Hitte-protocol.’
Mit as belangriekste punt:
‘Hou wor ik de hitte de boas.’
t Zel mie nait overkommen, dat ik as allaainloaten man op leeftied berusten mout in mien situoatsie, omdat aanderlu kontrole overnomen hebben van mien leven. Doarom schrief ik nou veur de toukomstege lezer, woar den ook:
1. Nait voaker dan ain moal in de weke onder douche, mit laauw wotter en nait teveul zaipe
2. Noa t douchen goud insmeren ( etiket is bieplakt )
3. Nait in de zunne ( zunne-allergie )
4. Bie binnentemperaturen boven 25 groaden òfvoeren noar n koele plek
t Leste punt is n heikel punt. n Weke leden hebben wie, noa verschaaiden deurwoakte, zwoele nachten, toch mor besloten om n airco aan te schavven. t Was ondanks t goud geïsoleerde hoes gain doun. Mit zokse hoge boetentemperaturen waist ja nait, woarst t zuiken moust.
Van de weke bin k traauwens stiekom, veur t eerst sunt joaren weer ais noar t raaisbero òfraaisd.
Veur informoatsie over IJsland.
Woarom?
t Mout doar summers aangenoam weer wezen. Juli is op t aailand waarmste moand. Op zunnedoagen krigst hoogoet 13 groaden op thermometer. t Leek mie, mit t oog op te verwachten tropische doagen in bruierg Grunnegerlaand n schiere oetvalsbasis.
t Köst wel n poar cìnt.
