Genog zo… nou mout t gebeuren
Hou laank gaait t bedraigen van t volk nog deur?
Want wie blieven geseld deur politiek- en machtsterreur.
d’Overhaid speult aal joaren n schimmeg spel,
En de machthebbers* dij hebben heur aigen bestel.
Shell is nait aansproakelk meer veur de NAM?
Terwiel 50% van heur is; dit is toch gezwam.
Joarenlaank hebben zai ons leegtrokken veur aigen gewin,
En nou put leeg is, trekken zai heur verantwoordelekhaid in.
En woar blift de Stoat veur ons belang?
Of gaait dij mit in dizze zwoanezang.
Denken zai, dat proaten wordt men vanzulvens zat,
En t is over as men ainmoal zakt is in n daip gat.
Wuir wel echt over Grunnen proat in dit regeerakkoord?
Intied zedde Shell oet veurzörg al wel NAM overboord.
Wat speulde in dizze stoulendans mêlee … vroag woar ik mit zit.
Want “de groten” kregen 1,4 miljard dividendbelasten mit.
Is t veur Stad en Ommmelaand nou te loat, is hier de grode vroag?
Nog net nait denk ik, mits wie ons steveg reuren vanòf vandoag.
Negeer de Shell, gain sent komt nog in heur knip,
En ons Grunnegerlaand, dij nemen wie zulf in grip.
t Beste veurbeeld hebben wie nou toch in d’ haand,
Mit de ‘Plakkaat van Verlatinghe’ veur t Grunneger laand.
Woarin wie aaisen ons recht en strieden veur onze vaaileghaid,
En goan doar net zo laank mit deur tot elke stain steveg staait.
Wie mouten nou de verantwoordelken ais loaten trillen,
En loaten gain tied meer aan aal dat geneuzel verspillen.
De dege degelkhaid zegt nou in richt- en slichte toal,
t Is doan mit aal dat gepolitiek en grootmacht schandoal.
Loat dudelk wezen, der is hier gain sproake meer van keus,
En wie goan ook nait akkoord mit n sigoar oet aigen deus.
Aal dij 50 joar profiteerd hebben van ons ondergronds pronkjewail,
Zellen nou tot de lèste cent betoalen aan t herstel van ons landsdail.
(* Shell, Exxon en NAM)
