Fopkedo
t Is weer zo wied. Sikkom dezembermoand en din is t ja ook al gaauw Sunnerkloas. Gezienus en Geesje vienden t n hail schier feest. Aaltied al vonden. Haile femilie komt din thoes op veziede en der worden kedookes oetdaild en gedichten veurlezen en t gaait ter din om heer, allernoast.
Gezellege tied.
Gezienus is al weken veurtied aan t noadinken hou of hai der mit aan mout. Hai wil ja groag n hail schier gedicht schrieven, mor dichtwèl doar t oet kommen mout, wil nait aaltied zo mor stromen en din het e der op n duur sikkom sloapeloze naachten van.
Geesje dut alles haitied mit leste snik. Zo gaait t ook mit kiender. Oldste gaait ter gewoon veur zitten as t zo wied is en schrieft zien gedicht. Ain noa oldste het ter voak eerst gewoon wat mit ien kop lopen en kin t din ook hail nuver op pepier zetten. Op twij noa oldste moakt ter veul waark van en begunt al op tied. Wil niks aan touvalegheden overloaten en is n week veurtied al kloar. Jongste mout ter alderdeegs nog aan begunnen en dij zegt dat zai t wel evenkes ien traain op rit noar t Noorden doun zel. Din het zai mooi wat om handen ien dij twij uur van raaizen. Kolle kaant blift ter voak hail rusteg onder, dij lopen der nait aalweg over te zoezen en doun gewoon wat mout. Dij hebben gedicht aaltied mooi òf as t zo wied is. En der nog wat slim slaauwe dingen ien zet ook nog. Joa, dat van dij stille wotters mit daipe gronden, dat klopt as n bus. Baaide jongsten wil t ook nog wel ais sikkom miskullen, omreden zai doun dichtwaark mit leste snik. Din zel ie zain dat inkt ien printer net op is en zuks wat meleur meer, mor t komt aaltied nog krekt op tied weer veur nkander. Oma het t ook aaltied n schiere dag vonden. Was der ook al wied ien t veuren mit aan loop en stak ter n bult waark en tied ien. Moakte ook fopkedookes veur klaainkiender en dij vonden dat geweldeg. Mozzen soms wel tien moal weer aarns aans hìn te zuiken noar felbegeerde kedookes en slik. Op tillevizie is tegenswoordeg rekloame van Albert Heijn, dij mie slim dinken dut aan oma heur kedograpkes veur klaainkiender. Mit oma haar ook opa, dij t apmoal aan oma overluit, Sunnerkloas n geweldeg mooi feest vonden en der vrezelk van genoten.
Tegenswoordeg, nou kiender groot binnen, gaait Sunnerkloasfeest wat aans. Elk mout ain echt kedo kopen veur tussen tien en twinneg euro en der n algemain gedicht bie schrieven over femilie, mor der mout ook n gek kedo kommen, n ding of fertuut dat gever stommegeern kwiet wil. Deur n spel worden kedos omstebeurt touwezen aan ain van lu. Deur te dobbeln verwizzeln kedoos din van aigender. Ain dij n kedo het, pakt dij oet en leest gedicht veur. Din mout ter vannijs mit dobbelstain gooid worden en het n aander beurt. As ain n zès gooit, mag hai kedoos opschoeven loaten ien kring noar n aander, gewoon mit wiezer van klok mit of schuuns over. Hierbie gaait t vanzulf om kedoos dij ain juust geern of juust abseluut nait hebben wil. Wat heb ie nou aan n ollerwetse slieptol dij t nait meer dut en wel tien kilo weegt? Mor n boukebon wil elkenain ja wel geern hebben. t Spel gaait ter om weg dat t n laive lust is en ondertied wordt ter vanzulf wat dronken en ook slikt. Der wordt bèlkt en laagd en oavend vlugt veurbie. Op t ìnd het elk n kedo en ain of meer dingen dij aandern groag kwiet wollen. Din is t ja kunst om vot te goan en dij kedos gewoon te vergeten, zodat gastvraauw der mit opzoadeld wordt. Mor dij is ook nait veur de poes en het veureg joar achterbleven slieptol n poar doagen loater bezörgd bie nije aigender. Haar hom ook nog even n foto tou appt mit bericht dat zai vergeten kedo mor even bie hom thoes op sloapkoamer bezörgd haar. Zai haar nog n sleudel van zien hoes had ja van op bloumen paazen ien vekaanzie. Dat haar speuld tussen schoonzeun en schoondochter en rest het ter dik lol om had.
Gezienus het dismoal wat van zolder hoald. Hai wil zolder toch oproemen en hai mout ja aargens begunnen. Mit pien ien haart het hai toch noa laang noadinken n dik stuk oetzocht en dat ienpakt. Hail swoar is kedo en dat mout begun worden van zolderoproemerij.
Schaande dat jongelu niks van zolder òf hebben willen. Hai het doar ja zokke schiere olle dingen stoan. Schaande om t zo mor vot te doun. Hai kwam ook bie zuiken nog weer van alles tegen dat van kiender is. Mout binnenkort apmoal mor noar Stad tou, doar zai nou wonen. Nichtjes mouten heur baaident ook nog ienrichten. Veur heur holdt ter ook nog genog tou op zolder. Mor din mout hai weer mit Sunnerkloasgedicht wieder. t Wil mor nait lukken. Gain iensperoatsie. Dat wordt vannijs n sloapeloze naacht , dinkt hai as e bèr ienstapt. Hai rolt wat hinneweer en kin sloap nait vatten en as t op t lest zo wied is, ligt hai swoar te dreumen. Anderdoagsmörgens is hai al vroug wakker. Naacht het hom iensperoatsie brocht en votdoadelk noa t broodeten gaait Gezienus achter computer zitten. Gedicht rolt ter as vanzulf oet en doar staait ien dat hai haile zoldervol spullen votgèft as ploagkedo.
![](https://dideldom.nu/wp-content/uploads/2023/09/afbeelding-27.png)
Wat zel Geesje blied weden dat hai zolder toch oproemd kriegt. Dij zeurt der ja al joaren over dat zolder leeg mout.
‘Zellen kiender der blied mit weden?’, vroagt hai hom òf. ‘Nee, t mout ja juust n ploagkedo weden, din mouten zai t juust vrezelk vienden.’ As dat t geval is, mout hai allinneg nog mor zörgen dat hai pakje mit haile zolder der ien nait zulf weer touschoven kriegt op pakjesoavend. Hai zel der bie zetten dat winnoar veur meertmoand boudel aan kaant hebben mout en zolder leeg.
Loat pakjesoavend dismoal mor kommen. Gezienus is der kloar veur.