Fokus
In de verhoaltjes over Johan Baarghoes en Berend Oosterman (Kreuze 38) heb je lezen kind, dat n verpleeghuus gain stee om te wonen is, as je jong (of old) binnen en nog wat van joen leven moaken willen. t Kin ook aans. Veur lu mit n swoare liggoamelke bepaarken is der n meugelkhaid om zulfstandeg te wonen. Dat kin ook as je bevubbeld n slimme spierzaikte hebben en altied verzörgen achter d’haand hebben mouten.
Doar heb we in Nederland n ainmoaleg concept veur: Fokus. Der wordt tegenswoordeg veul over proat, dat der meer aigen regie in de zörg kommen mout. Dat is woar t bie Fokus al meer as datteg joar om draait. Alhouwel, ‘zörg’ is t goie woord nait. Doarom hait t bie Fokus ook ‘assistentie’.
Liggoamelk òfhankelk wezen, betaikent nait dat je nait mans genog binnen om veur joezulf te zörgen. As je zulf moar waiten wat je willen, wat je neudeg binnen en wat goud veur joe is. En dat mout je goud aan n aine uutstukken kinnen. Den kin je hail best joen aigen leven laaiden en doar is t Fokuswonen veur bedould. Dij in n rolstoule zit en 5 of meer uur in de weke assistentie neudeg is, kin n stee vinden bie Fokus. Der is 24 uur doags assistentie bie wat in t Nederlands ‘Algemene Dagelijkse Levensverrichtingen’ nuimd wordt.
ADL-assistentie gaait om hulp dij je neudeg binnen veur joen doagleks funksioneern, zo as joen liggoamelke verzörgen, joe aan- en uuttrekken, noar t gemak goan, eten en drinken, ainvoudege verpleegkundege handelns en wat hand- en spandainsten. Dat gaait op òfroup en aanwiezen van de cliënt. t Gaait t benoam om rechtstreekse assistentie aan de perzoon zulf, ze helpen nait bie t huusholden, eten moaken, bosschoppen doun enz., dat mout je zulf regeln. Wieder is der ook gain bemuien mit hou je joen leven inrichten en krieg je gain begelaaiden. Joen sosjoale zulfredzoamhaid mout groot wezen. Zo wordt t meugelk om volweerdeg in de soamleven mit te doun en joen aigen leven te leven.
Fokus is zo ainmoaleg, omreden dat t (nog) naargens aans in de wereld veurkomt, tenminzent nait op dizze schoal: In Nederland binnen der meer as 90 Fokusprojekten, doar rond n 1.300 cliënten wonen. In Grunnen binnen drij projekten, aal drije in Stad.
Meer infermoatsie over t Fokuswonen staait op de webstee van Fokus: http://www.fokuswonen.nl/
