Waar kom je weg, dan?

As n Grunneger in t Nederlands noar joen woonstee vragt, zel e mainsttied zeggen: “Waar kom je weg, dan?” As antwoord zel den mainsttied de Nederlandse ploatsnoam geven worden. n Vraize kin t nog wel es in zien aigen toal zeggen, moar Vraizen binnen ook grootser op heur toal as wie.
De ploatsnoamborden binnen in Vraisland den ook twijtoaleg. Nait overaal, heb k heurd, t Schient dat der ook ploatsen binnen dij allenneg de Vraize noam bruken. Zo verschenen bie ons in ainen ook wat borden mit inkeld n Grunneger ploatsnoam derop. t Bleek n grap te wezen van n stedentendispuut in Stad. Zie haren over t bord Groningen n ploade bakt mit Grönnen Stad. En ze kondegden aan om dat op meerdere steden te doun. In Eenrum wuiren plakkoaten mit Ainrom ophongen.

Ook Slochtern en Aisen kregen heur aigen bord (k leuf nait dat dit de goie noamen binnen).
Zuks nijs is sikkom altied goud veur n diskuzzie in t belpergram van Noord. Begun oktober ook weer. k Leuf dat der meer tegen- as veurstanders te heuren waren. En vanzulf – wie lieken wel Hollanders – mozzen gounent votdoadlek vroagen wèl of dat betoalen gaait. Ik wil nait over de sinterij proaten, t mout benoam om t prinsipe goan: Ik bin der wel mit veur. As je t bruken van de Grunneger toal doardeur wat aanpeerdjen kinnen, woarom den nait? En de Vraizen doun zukswat ook ja… Moar t mout bie ons wel net even aans. Wel twijtoaleg, zoas bie de noabers, eerst in t Nederlands en doaronder in de streektoal. Moar doarveur huif we nait aal dij grode borden vervangen. As we dij nou gewoon stoan loaten en der n klaainer bord mit de Grunneger noam onder moaken, dat is mans genog wat mie aangaait. Den kom je nog bie de vroage, wat of de goie spèllen wezen mout. Om de lokoale dialekten eer aan te doun, mout we blieven bie t dialekt dij doar in de ploatse of streek proat wordt. t Huift nait zo te wezen dat bievubbeld de Westerkwartierders opscheept worden mit noamen dij veenkolonioal klinken. n Dörp as Enumatil nuim ik Aimentil, moar in t buutswoordenboukje van Siemon Reker staait IJmentil. Siemon zel t wel waiten, loat we ons doar moar aan holden. Den wuir op Noord nog even vroagd of de stroatnoamen den ook in t Grunnegers mouten. Dat kin nait, dat wordt te stoer. Wie binnen inwoners van Nederland en zellen reken holden mouten mit lu uut aander windstreken. Wat n aargernis veur de Zuder- en Westerling om stoere Grunneger stroatnoamen opzuiken te mouten. Boeten dat: t Kin aal wel aanpaast worden in de TomTom, de Bos Atlas, Google Maps, wegenkoarten en wait ik mie veul wat nog meer. Moar man och man, wat n peenze waark zel dat wezen. En wat zel dat n geld kosten. En wèl gaait dat be…
(moar ho, dat zeg ik nait).