Eersterd
Begun meertmoand,
winters weer al even aan kaant,
zaag k zo mor ain vlaigen boven gruinlaand
drij doagen noahéér wazzen der aal veul meer
roem n week loater kivvend kiewiet roupend,
zitten zai nait laanger doeknekt trankiel ien veld
binnen zai ien tied ook al goud op kòlle weer ienstèld,
goan ze verniend te keer tegen kraaien en rouken
boidelnd en daanzend van ain noar aanderkaant
bìnzeln zai beloagers vot bie heur nusten,
regaaiern keboalmoakers over t ienpaalmd laand
zai stonnen mie haalf mit heur kibbelsnoetend lewaai
k bin laand op goan, heb wat hinneweer struund, en doar
zaag k ien klaain kleums koeltje eerste kiewietsaai.