Droadproatn Facebook-interview mit Marlene Bakker

Wie hebben in Kreuze al n moal wat aandacht geven aan zangeres-laidschriefster Marlene Bakker (Nijziel, 1984). In nummer 39, november 2012 konden ie lezen over t Grunneger gevuil in heur meziek. Toun was ze benoam aan d’loop mit waark van Ede Staal. Moar ook veur heur is der meer as Ede. In t laid ‘Loat Grunnen Nait Zakken’, dij in jannewoarie uutkommen is, holdt ze vast aan dat Grunneger gevuil. Hou staait t der veur mit Marlene Bakker? In Droadproat kinve wel es n beetje mit heur bieproaten.

Bert Wijnholds

Marlene, t is al n zetje leden da’k in Kreuze over die schreven heb. Hou gaait t der mit?

“Best goud. Mien single wordt goud draaid op radio en veul minsen hebben hom download op YouTube, Soundcloud en iTunes. Geft n hoop pozitieve energie om nij waark oet te brengen.”

Hest in jannewoarie ‘Loat Grunnen Nait Zakken’ uutbrocht, kinst ons wat vertellen over t ontstoan van t laid?

“Gerhardt Heusinkveld kwam tiedens n Grunneger Dainst in Amsterdam Hanne Wilzing tegen. Hai kwam mit zien gedicht ‘Loat Grunnen nait zakken’ en de vroag of Gerhardt t op meziek zetten wol. Toun t ainmoal kloar was vroug Gerhardt mie om t in te zingen. Toun ik de tekst las was k metain verkocht. Kreeg noppen op de hoed zoals Henk Scholte dat aaltied mooi zegt. De opnoames bie Bernard Gepken (gitarist Daniël Lohues) verluipen zo goud dat we besloten t metain oet te brengen onder Gerhardt zien label.”

Doe vinst t gain protestlaid, woarom nait?

“Klinkt zo negatief. t Laidje is juust n hart onder de raim veur ale mìnsen in t eerdbevensgebied en n ode aan Grunnen en de Grunnegers. Der wordt aal zo pessimistisch noar Grunnen keken. Dat moakt mie echt boos. Ik kin mie dood aargern aan tv as t over Grunnen goat. Minsen zetten continu n verkeerd beeld neer. Ik wil just mooie pozitieve meziek over Grunnen zingen. Ik
bin trots op Grunnen en dat ik der woon.”

Dat Grunneger gevuil, woar k doudestieds over schreef, zit hier hail staark in, of nait?

“Joa absoluut, dat sprak mie ook zo aan in t gedicht. Ik wer aansproken en wos zeker dat meer mìnsen dat hebben zellen. Veuraal t refraain vin ik mooi: ‘Grunnegers heur je nait gaauw kloagen / doe bistoe en joe binnen Ie / as ze slicht n onske vroagen / dou der den mor n kilo bie’. Grunnegers binnen enorm beschaaiden minsen. Ze waarken hard moar kloagen nait snel. Mooie aigenschoppen, moar ik dink dat wie wel wat meer veur onszelf opkommen maggen. En ook zain loaten dat we trots binnen op ons pervinzie.”

Huifdest der nait laank over noadenken om t op te nemen. Paast t laid meziekoal bie die? Is t, mit Hanne Wilzing zien tekst en Gerhardt zien meziek, n echte Marlene Bakker?

“Veuraal de boodschap paast perfect bie mie. Meziekoal zain, zai ik de single als n interessant uitstapje. De EP dij ik dit joar goa opnemen zel wel n aandere stiel hebben.”

Kinst doar al wat over vertellen? Wat kinve verwachten dat typerend veur dien meziek is?

“Lastege vroag! De nummers dij k nou aan t schrieven bin stoan nog echt in de kinderschounen. t Zellen in ieder geval zeer persoonleke laidjes worden.”

Gaaist de teksten den maist zulf schrieven, of zöchst doarveur nog weer soamwaarken mit aandern, zo ast ‘Wondern Van Mien Stee’ schreven hest mit Fieke Gosselaar?

“Ik pebaaier t apmoal zulf te schrieven, moar loat ale teksten wel checken op spelfouten deur verschillende mìnsen. Ik heb maarkt dat t toch voak lasteg is om teksten van aandern te zingen, omdat elkenain zien aigen stiel en onderwaarpen het. Moar wellicht zellen der ook soamwaarkens tot stand kommen. Zo bin ik wel mit n gedicht van
Fieke Gosselaar aan de slag goan.”

Is schrieven in t Grunnegers nog stoer veur die?

“Joa best wel. Ik volg sinds n joar cursussen Grunneger toal en ik merk wel dat t aal beter goat. As ik nou nummers schrief kommen der nou ook intuïtief grunnegse zinnen bie en dat is leuk te maarken.”

t Eerste schriefwaark da’k van die zain heb, t gedicht ‘Smilke’ (Kreuze 46), was goud. Hest nait veur niks de daarde pries wonnen bie de Grunneger Schriefwedstried. k Heb der nog wat van leerd, t woord ‘stroezeln’ kon ik nait.

“Hahaha wat leuk. Zo zai je moar weer. ‘Smilke’ ston al n poar joar op mien liest om òf te schrieven. Toun ik heurde van de wedstried vuilde dat as n goud moment om t òf te schrieven. t Ging mie hail makkelk òf, as of t gedicht al òf was veurdat ik dat ook doan har. Woarschienlek komt dat deurdat t al zo laank in mien hoofd rondspookt
haar.”

Grunnegers proaten dust nog nait zoveul. Dat is stoerder veur die, of nait? Is t zingen makkelker?

“Zingen is veul makkelker. Din kin ik mie veurberaaiden en de juuste woorden opzuiken. As ik mot proaten din wil k spontaan kinnen reageren en dat is juust stoer veur mie in t Grunnegers omdat ik Nederlands bin opvoud.”

Der binnen meer artiesten nait grootbrocht mit de Grunneger toal, moar binnen der wel mit aan dloop. Hou komt dat?

“Ondanks dat ik t Grunnegers nait spreek vuilt de toal wel hail herkenboar en dichtbie. Ik bin n Grunneger en ik maark dat as ik Grunnegs zing, minsen mie beter begriepen. De toal komt directer aan en dat is ain van de mooiste dingen dij je mitmoaken kinnen as je optreden. Ik dink dat meerdere artiesten dit ook zo vuilen. Ik heb joaren Engels zongen maar dat was toch aans. Doarnoast maark ik dat der ook vroag is noar Grunnegse meziek. Minsen hebben tegenwoordeg behuifte aan ‘echthaid. Dat kin om meziek goan, moar ook om ‘echte’ producten. Je zain t in ales terug. Van hou je je leven invullen mit eerleke producten tot n twijdehands of antiek meubel wat weer haildaal hip is. Wereld wordt steeds klaainer. TV en internet moaken dat alles haail dichtbie is. Doardeur hebben minsen behuifte om noar hun aigen kultuur terug te griepen. Ik maark dat bie miezulf ook. Ik bin aaltied op zuik noar authenticiteit en wil dat ook in mien meziek heuren loaten.”

Bist ook nog aan d’loop mit Engelstoaleg waark, of zitst nou haildaal op t Grunnegers?

Ik richt mie nou haildaal op t Grunnegers. k Heb maarkt dat ik mien tied goud verdailen mot. Dus t Engelstoaleg waark ligt veurlopeg op de plaank. k Heb t best drok op dit moment. Ik waark as docent Engels op twij schoulen in Grunnen, bin mit mien zus bezeg om n winkel/webshop op te zetten mit vintage/retro/antiek producten en ik treed regelmoateg op mit mien band. Ik regel aal mien boukingen, persberichten etc. op dit moment zulf dus das best n kerwaai.

Haarst de “echthaid” vonden in de laidjes van Ede. Is hai ook n meziekoal veurbeeld veur die? Wel binnen dat nog meer en wat veur invlouden hebben zai op die?

Absoluut, dij man is genioal. Hou hai in t Grunnegs zien gevuilens verwoordt vin ik prachteg. Zien laidjes goan echt aargens over. Dat maark ik ook as ik zien laidjes zing, minsen binnen stil. Je kinnen zain dat de minsen zien teksten echt woarderen en begriepen. Dat vin ik ook mooi aan Grunnegers. Wie hebben moar n poar woorden neudeg om t over haile daipe gevuilens te hebben. Gain poespas of woord teveul. Noast Grunnegstoalege meziek luuster ik noatuurlek ook veul noar Engelstoalege meziek. Ik bewonder Ani DiFranco enorm. n Echte ‘self-made woman’ mit aal hail wat albums op heur noam. Mooiste album van heur vind ik “Revelling/Reckoning”. Ik heb heur ook al n aantal keer live zain, aarg indrukwekkend. Zai zingt zo open en eerlek over van ales, kin je allenneg moar respect veur hebben. Fiona Apple vin ik ook aarg goud. Beheurlek intense meziek. Vooral heur album ‘When the Pawn’ is aarg goud. Ik hol echt van artiesten mit n aigen unieke sound zo as Anthony and the Johnsons, Tom Waits, Ray LaMontagne, Radiohead, Joan As Police Woman, Little Dragon. En zo kin ik nog wel even deurgoan. Ik hol ook van olle soulmeziek zo as Aretha Franklin, Martha Reeves and the Vandellas, Bill Withers, Otis Redding, Percy Sledge, Etta James, van die mitblèrmeziek, heerlijk! Ik luuster ainglieks van alles.
Van soul tot electro. En wel vinst goud in de Grunneger meziek? “Swinder vin ik aarg goud, schiere teksten en hun laidjes blieven metain in je hoofd hangen. Bin hail benijd noar hun cd dij dit joar uutkomt. Harry Niehof bewonder ik ook vanwege zien gitoarspul. Hai wait iets hail aigens neer te zetten. Daniel Lohues is din wel gain Grunneger, moar ik vin zien meziek echt geweldeg. Echt n rasmuzikant. Zien liveshows binnen ook aarg goud. Ook mooi hou hai humor en serieuze onderwaarpen noadloos in nkander over kin loaten lopen.”

Daniël Lohues trekt volle zoalen in t haile laand. Zit dat der ook in veur n vertolker van t Grunneger laid?

“Vanzulf! Daniel Lohues haar noatuurlek wel t geluk om landelek deur te breken mit Skik, dat het hail wat deuren veur hom opend. Moar zien soloalbums binnen stuk veur stuk haartstikke goud en dat trekt aaltied minsen dij zich aansproken vuilen deur zien meziek en dialectteksten. Aan d’aandere kaant blift t aaltied lasteg om mit dialectmeziek deur te breken in Nederland. Ik maark dat ook mit mien single ‘Loat Grunnen nait zakken’. In t noorden van t laand is de single goud oppakt. Maar in t westen wordt t nait draaid. As of dialectmeziek der nait tou dut. Ik zai doar wel n uutdoagen om dat te deurbreken. Toun mien single nog moar net oet was, wer k nuigd in De Wereld Draait Door. Moar op t leste moment is dat toch ofzegd. Ze haren al teveul meziek pland en wie werren aan kant zet. Zo gaait dat in dij wereld. t Gaait der keihard aan tou. Most die doar nait deur loaten kisten. Kop der veur en gewoon deurgoan. Meziek mot op d’eerste ploats veur diezulf genoegdoening geven, doarnoa mot je moar kieken of aandern t ook mooi vinden, aans wor je denk ik doodongelukkeg.”

Marlene Bakker, daank veur dizze Droadproat. t Leste woord is aan die.

“15 Meert is de Dag van de Grunneger Toal. Elkenain is nuigd om te kommen genieten van Grunnegse dichters, sprekers en optredens van Bert Hadders, Törf, Harry Niehof en wie speulen ook!”

‘Loat Grunnen nait zakken’
Marlene Bakker
Te beluustern op YouTube en Soundcloud.

Marlene Bakker heur webstee: http://www.marlenebakker.nl/

Marlene Bakker op Facebook: https://www.facebook.com/pages/MarleneBakker/194869873911963

Marlene Bakker op Twitter: https://twitter.com/MarleneBakker

Marlene Bakker op Soundcloud: https://soundcloud.com/marlenebakker

Marlene Bakker op YouTube: http://www.youtube.com/channel/ UCLov0nEsaTFZhVJICbKAAVQ