Golf Noa Golf

Op mien aigen webstee schreef k benoam in t Nederlands. Sunt ik veur Kreuze aan loop bin, mout k vanzulf aal meer Grunnegers schrieven goan. Van d’hollandse stukkies dij k tot zowied schreven heb, goa k t schierste omtoalen. In dezember 2010 haar k wat schreven over de spaigelploade dij Harry Niehof toun net uutbrocht haar. Doar heb k nou n Grunneger tekst van moakt, dij k veur Kreuze ook nog es uutbraaid heb:
t Dubbelalbum Golf Noa Golf dij Harry Niehof lest uutbrocht, het twij kerakters. d’Eerste schieve, doar twaalf nije nummers op stoan, is opnomen mit zien meziekoale vrunden Herman Grimme en Johan Viswat.
In Niehof zien meziek komt voak n soort van winsteghaid weerom. Zo wil e geern noar de wiedste kontrainen achter d’horizun, moar den ook weer noar huus. In t eerste nummer, Begun, komt e thuus van zo’n raaize, meschain wel dij Van Middelsom Noar Madrid.
Winsteghaid, joa doar binnen meer soorten van. Zo kin j’uutkieken noar wat nog kommen mout. De Meermin Van Meerstad wacht tot der indelk n moal woater komt. Bie de laifde komt ook voak winsteghaid kieken. d’Aine het winst noar de laifde, d’aander van de laifde. Der binnen ook lu dij mainen dat ze noeit genog laifde kriegen kinnen, dij binnen winsteg noar meer. Doar kin wel es ontraauw van kommen, dat voak nait zunder gevolgen blift. In 1928 is doar al t laid Makin’ Whoopee over schreven. Bie Harry Niehof is dizze jazzy sikkom-klassieker Dat Gait Van Joepie haiten goan.
Hai kin ook goud laidjes schrieven over de bekrompenhaid en t mistraauwen, doar pladdelaanders mit noar vrumden kieken. Dat kin e serieus, moar ook mit onderkoulde humor. In Doodstil konden lu nog wel es geliek hebben, mit heur bedenkens bie t gezelschop dij in n lege boerderij dele strikt. Der is wat loos bie dat volk, moar wat ze wel ommaans hebben? In aals geval, as ze weer votgoan is der ain perzoon minder bie.
In t drijstemmegge laid Kleurege Jaas (hierin zingen Inki de Jonge en Carmen Schilstra mit) sturen laandaarbaiders aine vot dij der aans uutzugt as zai. De vrumdeling wil goudbedould mithelpen bie t oogsten, moar d’aarbaiders vinden dat e allenneg moar in de wege lopt. En t waark op t laand mout deurgoan, dus wegwezen doe!


t Twijde dail van Golf Noa Golf geft ons Harry Niehof in zien puurste vörm, zoas e mainsttied optreedt, allenneg mit zien stem en n gitoar. Hai wol n poar van zien oldere laidjes ook es solo en akoestisch opnemen, dij den hail aans klinken as op d’albums Cuba Blues en Altied Onderwegens. Zo binnen Alles Veur Die, Grunnen Leeft en Swaarde Leegte van ale fraanje ontdoan, zunder dat ze minder staark worden binnen.
Dail 2 bevat ook vief nije teksten. Ook hier is weer winsteghaid bie, verlaangen noar wat nait kin. Harry wil zuk overgeven aan t wilde, roege artiestenleven. Moar dat kin even nait, want hai zit net mit de Kat op schoot. Wat ook nait zomoar kin, is van Stad weerom goan noar t pladdelaand. Hai wol as pervinzioal overnijs begunnen, moar zien grunnegerschop was al vieventwinteg joar verlopen. As allochtoon mos e eerst moar es noar n Inburgeringscursus tou.
Veur n Grunneger is Harry Niehof best wel romanties, zong e zulf al es n moal. Dat huift bie ons nait stoer te wezen. De ainvoudege romantiek van Lou Reed zien Perfect Day komt ook noar veuren uut de Grunneger omtoalen van Schiere Dag.
Op Golf Noa Golf stoan veul schiere laidjes. In Grunnen wait we allaank dat Harry Niehof zukzulf vonden het in de streektoalmeziek. Nou is t de vroage, woarum de rest van t laand hom nog nait vonden het. Mit zien daarde staarke spaigelploade is e de beste vertolker van de Grunneger blues, dij hail best noast de Drintse stoan kin.

Meer van t zulfde:

Ploats hier joen reactie op dit stòkje; algemaine reacties kennen in t Gastenbouk

Het e-mailadres wordt niet gepubliceerd. Vereiste velden zijn gemarkeerd met *

Achtergrond info:

Geboren op: 9 september 1973
Woont in: Stad
Schreef in: Kreuze
Blogt op: https://www.bertwijnholds.nl/

In 2004 haar k veur t eerst n aigen webstee, woarop k in t Nederlands schreef. Mien eerst schriefsel in t Grunnegs is n blogbericht van meert 2010, over d’eerste Dag van de Grunneger toal. In maai 2011 wuir k tekstredakteur van t digitoale Grunneger tiedschrift Kreuze en vanòf dat mement bin k allenneg nog in t Grunnegs schrieven goan. In jannewoarie 2023 is Kreuze opholden te bestoan. k Bin doarmit stopd as tekstredakteur en k hoop nou meer mit aigen schrieverij aan d’loop te kinnen. Mien schrieverij bestaait t mainst uut blogs over n verschaaidenhaid aan onderwaarpen.

E-mail bie wat nijs?