Droadproatn Facebook-interview mit Fieke Gosselaar
Dichteres en radiocolumniste Fieke Gosselaar (Finnerwold, 1982) het lestdoags heur debuut moakt as romanschriefster, mit de Nederlandstoalege bundel ‘Tussen de anderen’. De verhoalen binnen inspireerd op zoaken dij zai tegenkomt in heur affeer as strafrechtjuriste. t Is heur twijde bouk, noa de Grunneger dichtbundel ‘Nova Zembla’ dij vleden joar uutkommen is. d’Eerste kritieken binnen over t algemain pozitief, meschain is ze n aanwinst veur de Nederlandse literatuur. In dizze ‘Droadproat’ is t woord aan Fieke Gosselaar.
![](https://dideldom.nu/wp-content/uploads/2023/08/afbeelding-173.png)
Fieke, dien bouk is al n zetje verkriegboar, nog van haarten felesiteerd dermit. Bist der wies mit? “Joa, ik bin der slim wies mit! t Is haail mooi de verhoalen, dij in twij joar tied as computerbestand langzoam opbaauwd binnen, den echt as n bouk in handen te hebben. En t is haail leuk dat minsen t nou ook kinnen lezen.”
‘Tussen de anderen’ het al goie recensies kregen, binnen de reaksies van lezers ook positief? “Joa, gelukkeg wel! Lezers vinden t interessant om over achtergronden te lezen van minsen dij strafboare feiten plegen, hou ze doar tou kinnen
kommen. Ze zeggen dat t haail makkelijk wegleest.”
De verhoalen goan nait over rechtszoaken. Doe wolst veuraal de mens achter de doader zain loaten?
“Joa, de doad zulf is nog laank nait t verhoal. t Personage moakt t verhoal, hou dij reageert op situoaties, zoas n pubermeisje dij onder drok van n vriendin geld oet de kassa steelt of n man dij deur psychose brand sticht. Veurdat n mins doader wordt, is der wat aan veuròf goan.”
Hest der bewust veur kozen om t bouk in t Nederlands te schrieven?
“Joa, proza schrief ik altied in t Nederlands en ik schreef ook al eerder proza as poëzie, dat is der loater biekommen. Eerst was poëzie ook in t Nederlands, moar Jan Glas het mie der op attendeerd dat t in t Grunnegs ook meugelek was, en veur poëzie vind ik t Grunnegs haail geschikt, omdat dat ook as je t veurleest haail mooi klinkt en zingt.
Proza in t Grunnegs waarkt veur mie nait, dat binnen te veul woorden, en ik kin nait alles opschrieven wat ik wil. t Grunnegs is nait mien eerste toal, dat is Nederlands, dus in t Grunnegs zal ik nait zo daip op de personages in kinnen goan.”
Doe bist dus nait grootbrocht mit de Grunneger toal. Woar hestoe t den leerd? “Op legere schoule zat ik in n klas woar veul Grunnegstoalege kinder in zaten, dus zo heb ik t oppikt, en loater heb ik 2 joar voetbald dus toun mos ik t ook proaten.”
Gaait die t schrieven in t Grunnegers den ook stoer òf?
“t Schrieven in t Grunnegs gaait mie nou nait stoer of, ik bin der ondertussen wel aan wend, al beweer ik naait dat ik foutloos schrief. Ik schrief t gewoon, veurdaail bie mien column op radio noord is dat gainaine zugt hou dat ik t opschreven heb.”
Wat vinst t schierst om te doun?
“Dat het meer te moaken mit wat ik schrief, n verhoal, n gedicht of n column den mit de toal. Veur n gedicht en n column schrief ik t laifst in t Grunnegs. Veur de column het ook veul te moaken dat ik doarbie gezelleg mit Rene Walhout n kopje kovvie kin drinken tiedens oetzenden op radio Noord. Veur n verhoal dou ik laiver in t Nederlands, moar dat haar ik al n beetje oetlegd. Momenteel schrief ik nait veul gedichten, omdat mien heufd meer noar verhoalen staait.”
Binnen der ook schrievers en dichters dijstoe as veurbeeld zugst? En wat hebben zai veur invloud op dien schriefwaark?
“’Voak as ik lees, krieg ik zin om te schrieven. Veural bie dichteres Astrid Lampe krieg ik voak allerlei beelden in mien heufd of associoaties. En Jan Glas is mien favoriete Grunneger dichter, soamen mit Melle Hijlkema. Verder heb ik voak periodes van n schriever. Den lees ik Dimitri Verhulst en nou ben ik net bezeg mit bouken van Esther Gerritsen.”
Is t waark van aandern de grootste bron van inspiroatsie veur die? Wat kin die nog wieder tot schrieven aanzetten?
“Nee, dat nait. Ik vind inspiroatsie in mien omgeving. As ik minsen zai op stroat of as ik verhoalen tegen kom op mien waark. Dingen dij ik mitmoak en dij blieven hangen in mien heufd, as dat t geval is, den mot ik der wat mit doun.”
In de Grunneger meziek leeft de streektoal ook bie jongere artiesten. Ik kin wieder gain jonge schrievers en dichters dij dermit aan d’loop binnen. Binnen der nait zoveul?
“Nee, der binnen nait zoveul. Hest Marlene Bakker en Swinder. Veul van onze generoatsie hebben van heur olders gain Grunnegs leerd. Wie traauwens ook aal nait, Marlene nait en Bas (Schröder, zanger van Swinder, red.) nait en ik ook nait. Moar Bas zien ollu binnen ook nait Grunnegs, en bie mie is mien moeke nait Grunnegs, dus den is t ook weer logisch dat wie Nederlandstoaleg opvoud binnen. Hou t den komt dat wie touvalleg wel mit Grunnegs bezeg binnen, kin ik nait verkloaren. Ik denk dat wie groag mit toal bezeg binnen en t Grunnegs laint zoch goud veur zowel meziek as veur poëzie.”
Marlene Bakker het veur heur nije single dien gedicht ‘Leeuwtje’ bewaarkt. Swinder dee dat al mit ‘Mesienes’. Hou vinst dat?
“Leuk! Van t gedicht ‘Mesienes’ is n laidje moakt veur Poëziemarathon 2013. In t Oude RKZ organiseerde Kasper Peters n oavend woar hai verschillende dichters en singer-songwriters aan nander koppeld haar, zodat Bas Schröder van Swinder vanzulfsprekend vanwege t Grunnegs aan mie koppeld was. Hai het toun ‘Mesienes’ oetkozen en dat is zeker goud lukt. En ik vond t gedicht ‘Leeuwtje’ haail geschikt veur Marlene en heb heur toun vroagd of ze der wat mit kon. Gelukkig vond zai t mooie tekst en zag ze der wel n laidje in! t Is nog veul mooier om n gedicht tot leven te zain komen as echt laidje.”
Hest Marlene al es holpen mit t schrieven van n laidtekst. Lieken poëzie en meziek op nkander?
“Soamen hebben wie ‘Wondern van mien stee’ vertoald oet t Engels van n laid van Adele, ‘Hometown glory’. Ik heb gain idee of der verschil zit tussen t schrieven van meziektekst of poëzie. Baaide laidjes ‘Mesienes’ en ‘Heufd as helm’ binnen gewoon gedichten. Swinder en Marlene hebben doar laidjes van moakt. Ik heb gain verstand wanneer n zin in n tekst goud te zingen is, dus dat doun ze zulf den.”
Hest al nije schriefplannen?
“Joa, ik goa gewoon deur. Mit elke week column noatuurlek en den weer mit n nij bouk begunnen.”
Fieke Gosselaar, daank veur dizze Droadproat. t Leste woord is aan die. “Ik denk dat ik al veul zegd heb en zal t eerst nait waiten! Doe ook bedankt!”
‘Tussen de anderen’
Fieke Gosselaar
2014
Ambo|Anthos Paperback € 16,99
Ebook € 9,99
‘Nova Zembla’
Fieke Gosselaar
2013
Kleine Uil
Paperback € 12,50
Ebook € 9,99
Te koop bie joen boukhandel.
Fieke Gosselaar webstee:
http://dichtstadgroningen.nl/#/fieke-gosselaar
Fieke Gosselaar op Facebook:
https://www.facebook.com/fieke.gosselaar