’Dop-aarten’, eerste Grunneger proatklupke ien Amsterdam
As n klap mit Mahler-hoamer, zó haard mot t bericht wel aankommen wezen van ’Dop-aarten’, t eerste Grunneger proatklupke ien Amsterdam! Nait dat dij klap aarns ien Amsterdam te heuren waas, mor ik haar mie t veurstellen kind.
Eerste bieainkomst mit zes minsken waas op dinsdagmirreg 30 jannewoarie 2018, bie kovvieklup Doppio op Gustav Mahlerloan 16, vlak achter Station Zuud. Dop-aarten haren van Doppio n apaart koamerke kregen, dus der kon ien ale rust Grunnegers proat worden.
Dou serveerster binnenkwam, zee ze nog ’hoi’ mit n /h/ en nait mit n /m/! Dus der waas vot waark aan de winkel!
Dailnemers bennen van oorsprong oet Stad, Garnwerd, Waarvum, Haren en Oethoezen, dus der zol ainks nog ain oet t Zuud-Oosten bie kinnen. En din wordt ter wel ains zegd, dat Grunnegers nait geern proaten. Niks van aan! Hai kerel, oren toetten ons der hoast van, zó veul kwam der op badderij: t Wad, gas, eerdbevens, meziek, biebeltaik en toal; wanneer wordt ter zegd: doe, ie en joe?; Dagboek van Mevrouw Slapsma-Tiessen; goa zo mor deur!
En dou mirreg om waas, zee Hollandse serveerster: Moi!
Eerste klap waas ien elks geval n doalder weerd!
Twijde bieainkomst zel wezen op dinsdagmirreg, 27 feberwoarie 2018 om 14:00 uur.
