Deurmatje Glieboan

Onze speultoen zit an Meeuwerderweg in Boeten Oosterpoorde in Stad ja.
En door stonnen altied drai glieboanen.
Je kon dan laangs grode iezern trap noar boven en kon dan noar klaine, dai onder de grode deurging of de aandere klaine dai noar links ging of netuurliek de grode glieboane.

Veur mien gevuil was grootste wel zes tot acht meter hoog.
Veur baangerikken as ik was t gloepenshoog.
t Huile bouwwaark was moakt van iezern buizen dai oalmoal zilver vaarfd waren.
En glieboanen waren ook van iezer met oalmoal holten latten der over hén.
De grode was met twai boggels der in, de klainern haren mor ain boggel.

As je der òf ging as kind, en je ging deur zon boggel, haar je t gevuil dat je moag omhoog kwam, mor dan mos je wel veul voart hebben.
t Was net of je even löskwam, net of je even vloog.
Dai holten latten waren oalmoal vastzet met doemroemte der tussen.

Veural lutje kinder mozzen oetkieken gain vingers der tussen te steken want dan kont wel es wezen dat je vast bleef zitten, kepodde vingers.
Mainstal keek de portier van speultoen der wel op tou.
Was ook wel neudeg want glieoanen waren zo in trek dat der soms verkeersregeloar bie mos, zodat elk op zien beurt der òf kon. Want der waarn altied veurkroepers.
Der was niks aan de haand as je mor de hannen op je knijen legde, glee je zunder kepodde hannen noar beneden.

Deur t veule gebruuk sleet glieboan zo gauw dat der splinters lös kwamen, dat was mie wat, as je ze in hannen kreeg, kon je ze der oethoalen mor in boksum was t minder.
Heulemoal as ze der deurhén gingen, haar je splinter in kont.
Nou, reken der mor nait op dat portier bie elk kind splinters oet de kont ging hoalen.
Nee, dan zee e “Goa mor even noar dien moeke tou.”
Joa, voaders konnen dat toun nog nait.

Olders maakten wel dat jongen oet speultoen voak boksum kepot haren, bie sommegen wer der lap opzet, mooi of nait, mor t huilp wel.
Der waren gounend dai haren oetvonnen dat as je deurmatje met nam, doar op zitten gingen, glieboan òf, dat dat nog beter ging, wat… ging nou zulfs gloepens haard.
As je t een beetje goud anpakte, kon je zo haard goan dat je twai meter deurschoot en in zaand belande.
Dat wer wedstriedje, matje boven op t begun van glieboan hénleggen, achteroet lopen, anloop en op matje springen, dat ging haard.

Hou dan ook, bie veul Oosterpoorters verdwenen de deurmatjes as snai veur de zun, veul matjes achter deur waren der nait meer, nee dai waren in speultoen in gebruuk.
t Bestuur vond dat de glieboanen anpakt worden mozzen.
t Wér te gevoarliek, nee vailighaid ston veurop bie speultoen.
t Holt wer der oafsloopt, stelloage schoonmoakt, en over t iezern freem kwam een naie glieboan, nait van holt, nee van stain, of aigenliek terazzo, wait je wel van dat gele spul woar de geutstainen en aanrechten toun ook van waren.
k Wait nait of der oeit aine over noadocht het, mor dai stainen bakken waren meer as vief centimeter dik en dat over de huile lengte, dat mot wel paor tón west hebben.
Vaileg? Dat, dat noeit noar beneden komen is.

t Zag der mooi oet, t was net of je van t aanrecht of glee.
Woarschienliek de mooiste glieboan van stad en omtrek, mor glieden dee e nait.
Kokosmatje der mor weer onder, joa hur, dat glee as n tierelier.
En door gingen de deurmatjes weer.
Ik wait, der bennen Oosterpoorters west dai hom achter deur vastspiekerd haren.

Nou wait je geliek ook woarom manufacturenzoak De Komeet altied n bak met deurmatjes bie ingang stoan haar. Verkoop luip goud, heul goud.
t Zol toch nait woar wezen dat De Vries van de Komeet gebruuk van deurmatjes zelf bedocht het?
En dai gain deurmatje betoalen konnen, dai haren voak jute zak achter deure.
En aans huilen kinder wel aine op bie Apeldoorns zakkenhandel an t Winschoterdaip.
Was altied wel aine dai nait te repareren was.

Deurmatjes van kokos bennen der nait meer, ook nait van rait en hoge glieboan zai je ook sikkom nait meer, nee man.

Mor nou zal ik joe vertellen, lest bennen wie met klainkinder noar Sprookjeshof in Zuudloaren west, en je kennen t geleuven of nait, ik ben 65 joar, mor ik ben van hoge gliemboan west met kont op deurmatje, man ik heb genoten.