De schuddeldouk
Mit de schuddeldouk ging ter wel als roar heer,
Het was voak ain gegleer en gesmeer.
De jongeren zellen doar wel nait veul van weten
En de olderen zel t ook wel nait meer verdraiten,
Mor ik wil joe geern wat vertellen van toun.
Wat kon je toch n bult mit zo’n schuddeldouk doun.
Het begunde s mörns al vroug bie de heerd,
Din was joe dij schuddeldouk al doalek veul weerd.
Want joen hannen wazzen veul van t aaske en t rout,
En schuddeldouk schoonde dij degelk en goud.
Din kovvie kloar moaken, de melkers kwammen weer,
De kopkes mozzen schoon, dus schuddeldouk mos der heer.
Kinder kwammen van ber òf, ook grootmoe ston op,
Almoal gaauw even de schuddeldouk om de kop,
Din mozzen kinder noar school, was t onder neus nog wat glad,
Even de schuddeldouk en ze kwammen weer netjes op pad.
Kwam boer smiddoags weer, haar wat mizze aan hannen,
Piep was wat voel, wel ook nait best brannen,
Even onder de pomp en vot was aal t stof,
En schuddeldouk dreugde din alles weer òf.
Jan kwam oet school, haar n bloudneuze kregen,
Bie Hinderkie mos je n flot modder òfvegen.
Kloas haar n dooie moes hail stief in zien haand,
Mor schuddeldouk muik alles weer netjes aan kaant.
Hai, de muggen haren overaal stippen op doan,
Doar mos schuddeldouk ook even over goan.
Manlu wazzen veur t eten n borrel gewoon,
Even schuddeldouk deur glaskes, din wazzen dij ook weer schoon.
En kreeg je din verziede op zo ‘n dag as Nijoar,
Mit schuddeldouk was je de haile dag kloar.
Mit euliekouken eten, slim de hannen onder smeer,
Even schuddeldouk pakken en kloar was t al weer.
Kwam domie op hoesbezuik, och zo’n man,
Dij gaf je gain kovvie in n doags kopke ‘an.
Mor zundoagse kopkes konnen stovveg soms wezen,
Ook dizze kwoal kon je mit schuddeldouk genezen.
Zo ging dat mor deur, tot soavens noa t eten,
Stoulen wazzen wat voal, dij mog j’ook nait vergeten.
Dat ging voak hail makkelk, was t toavelschoonmoaken doan
Din kon j’over stoulen even mit schuddeldouk goan.
Leutje potje ging reren, hai, de luier was nat,
Even schuddeldouk pakken en dreug was weer t gat.
Wollen kinder nait luustern of paasden nait op,
Din kregen ze n fleer mit de schuddeldouk om kop.
Bie winterdag gebeurde ‘t dat schuddeldouk bevroor,
Even in koken water en ook dat was weer kloar.
En omdat t woater toch kookte, joa zo was t mor net,
Wör doarvan deur moeke vot kovvie mor zet.
Zo bin ik mit n schuddeldouk de dag ais rond goan,
En was elk op ber en of t waark was weer doan,
Din huil vot bie geutstain de schuddeldouk wacht
Tot t waark weer begunde noa de rust van de nacht.
Optaikend deur G de Grooth-Speelman, opstuurd deur heur dochter Cora
