Dat mot mor nait weer!
Zol n spesioale menaaier van denken van lu oet n bepoald toalkontraain deurklinken ien hou ze dij denkwies ien heur toal oetdrukken? Of is t net aansom. Dat de toal doar ze ien opvud bennen n bepoalde menaaier van denken genereert? Kin je heuren aan hou mensen heur oetdrukken woar ze collectief ien verschillen van lu mit n aander toal? Denken noordelke dialectsprekers op net wat aander menaaier as Noorderlingen dij Nederlands proaten? Of is dit apmoal kulloazie?
Veurbeeld 1: n Zetje leden kregen wie n braifke: ‘Zoaterdag noar Stad west (noar ‘Dag van de Grunneger Geschiedenis’), mor t was zo òfloaden vol ien t ‘Huis van de Groninger Cultuur’; dat mot mor nait weer!’
Typeert ain hom as Noordeling mit zo’n zin?
Veurbeeld 2: Predekant, amateur-archeoloog en schoulopzichter Nicolaus Westendorp (1773-1836) kon ien 1825 tot perfester ien Leiden benuimd worden.
t Verhoal gaait dat, dou e zien vraauw dit veurlegde, zai hom vroug of ze ien Leiden t ooriezer ook droagen kon. t (Golden) ooriezer waas doudestieds t mainst typische dail van de Grunneger klaiderdracht.
Westendorp zee heur dat Leidse perfestervraauwlu dit nait gewoon waren.
Doarop zee vraauw Westendorp: ‘Dan moesten wij daar maar niet heengaan!’
t Grunnegers schient deur heur Nederlands hin, mor vanwege heur reaksie bleef Westendorp tot zien dood aan tou domie ien Losdörp.
Veurbeeld 3: Ien de hagiografie over predeker Wulfram wordt t mement beschreven dat Vraize vorst Radboud (?-719) hom deur dizze Frankische predeker deupen loaten wol. Veur t onderdompeln ien deupvont haar Radboud zien dikke toon aal ien t deupwoater. Ien ainen vroug Radboud aan Wulfram: ‘As ik noar hemel goa, is t grootste dail van Vraize oadel din ook ien hemel?’ Wulfram antwoordde: ‘Zuks kin nait t geval wezen. Zai bennen ja nait deupt en zellen dus ien hel zitten.’
Radboud bedocht hom votdoalek: ‘Ik verkais n hiernoamoals mit mien veurgangers.’
En ik denk dat e as Noorderling dou zegd het: ‘Dan moast ‘r mar net doopt wurde, tocht ik sa…….’
‘Din mot der mor nait deupt worden, ducht mie!’
En dat Radboud dou toon weer tou t woater oettrokken het.
Radboud dij hom op t leste mement nait deupen lait; Borduursel oet (noar oand wordt) begun 16e aiw.