Daanzen deur de roemte

· Detmers, Ab

As dij nuvere steerns
Lusterden noar mien haart
En de moan was t wichtje
Woar k van huil
Was t aalmoal bie mie
En ging tied noeit veurbie
Konnen wie daanzen
Deur de roemte mit gevuil.

Wie swierden din aal deur
As golden wolken zo licht
En vèr meziek
Gelaaide ons doarbie
Din was k aalmoal swicht
Veur zo n aibels nuver wicht
Wat zol k daanzen
Deur de roemte mit die.

Daanzen mit mien laiverd
Op vleugels deur t parredies
Wie zoezden din veurbie
Glad volmoakt zo mit die
Wat zolst doe daanzen
Deur de roemte mit mie.

• Facebook
• X
• LinkedIn
• Email
• Print

Gedichten

Meer van t zulfde:

• Vraize Deurlopers

• Dij goie olle tied

• Dat olle hoes

Woont in: Delfziel
Schrift al: joaren

Joa, op t heden is schildern weer n luk bietje in bie mie, mor der is n tied west dat ik as ain van d eersten van de Grunneger Schrievers nogal drok bezeg was mit schrieven verhoalen vertellen en dichten.
Toal en Taiken hebben toun hail wat van mie opnomen. Kunstgang Kaampe in Steem bin’k ook nog bie d oprichten west.
Zoas eerder zegt, k heb t nou drok mit schildern en tentoonstellens. Kiek mor even op mien Web-log, din krieg je n beeld van mien doun en loaten. Der stoan ook wat verhoaltjes op in t Grunnings. Dij toal mout der inblieven en smis tot groot verdrait van elk en ain proat ik (lel ik?) lekker deur. t Gait aal zo makkelk.