Crème de brume
Lauderzwaarteveen. Gainain wait woar dat is. Aan de Borgerweg veurdat dij uutkomt op de Veurbeetseweg. Der is al n speulgoudmezeum en veur heur aigen plannen dij grode leegstoande boerenploatse. Nee, gain wiedkederij, gain xtc lab. Zie hebben bedere plannen. Vief vaklu mit elk heur aigen uutstaarvend ambacht. Woaraan dij stolt vastholden in n nijmoodse wereld dij heur veur maal verkloart. Bienander zetten zie hier, op de boerenploatse in Lauderzwaarteveen, heur ambachtenzentrum op. Mit gezoamelke winkel, kovviekoamer, elk n aigen waarkploatse, kurzesroemte veur lu dij wat van heur leren willen.
Frits het altied gek west met klokken, de wereld van spiroalveren en tikkende roadertjes dij naauwkeureg in nander griepen. Antiek of nijmoods, hai wait de weg in elke klokke en kin hom repereren. Zien klanten mietern nait vot, kopen gain nije klokke. Frits moakt heur olde klokke weer as nij. Zien waarkploatse mit aal zien mesienen is nou in de boerenploatse in Lauderzwaarteveen.
Daarnoast zit Ariadne. Zie is herberist, heur waarkploatse haangt vol mit bozzen kruden. Overal stoan grode vlezzen, potten, buzzen. Uut netuurleke kruden moakt zie zaibe, broesballen, thee, koeraaiernde zaalven. Bekend is zie om heur mede. Hunnegwien op boases van moorsperea. Dij plukt zie zulf langs de Ruten Aa.
Luitzen is körvenmoaker. In zien waarkploatse hoog opstoapelde bozzen wilgentonen. Doartussen vindst hom. Zittend op de grond vörmt hai onder zien haarde doemen strakke ronde körven, rechthoukege waskörven, hengselkörven en zo. En ast stoulen bie hom brengst geft hai dij nije zittens uut biezen of rotanbonden.
Francesco is n gehaaimzinnege likeurstoker. Deur zien dikke brillegloazen staait hai toerloos te stoaren in zien desteloatsievat. Hai joekselt, schudt zien kop, desteleert vannais, geduldeg en aalmedeur. Tot dat hai krek de juuste smoak vonden het, n jechtege kunstenoar. Zien likeuren binnen aan de pries mor van n kwaleteit dijst naargens aans vindst.
En den Lieneke, akwarelschilder. Zie bleef hangen in Westerwolle om reden van t landschop en om reden van Geert Schreuder. Vegenist, zie pafket nait en zopt nait. Mor t landschop hier en luchten doarboven zet zie hail schier op pepier. Zie kwam mit t idee van dit ambachtenzentrum. Zie vond dizze boerenploatse, hoalde d’aandern der bie en trok heur over de strebe.
Vandoage heur eerste open weekend. Zie hebben veul rekloame moakt, folders en n webstee. Altied mit dat dudelke koartje der bie van hou ofst in Lauderzwaarteveen kommen kinst. Zie stoan kloar om d’eerste bezuikers te ontvangen. Heur alles zain te loaten en te demonstreren. Zie hopen dat lu t nuver vinden, dat dij wat kopen, nog es weerkommen, zok aanmelden veur n kurzes.
Op dit plechtege moment binnen zie aalmoal n bietje zenuwachteg. t Gaait der heer! Lieneke het kovvie kloar veur heur. Francesco komt binnen mit n vlezze en n bred vol lutje gloaskes. Hai loert gehaaimzinneg over zien brillegloazen.
“Minsen, k heb nou doch wat biezunders moakt. Zulf heb k t nog nait ains pruifd. Mor k docht: bie zo’n biezunder moment heurt n biezundere likeur. Mag k joe presentaaiern: mien crème de brume. Inspireerd op n veumirregdook in t landschop van Westerwolle.”
Hai schenkt de grieze vloeistof in de gloaskes. Aandern kieken bedinkelk. Lieneke waaigert, zie zopt nait.
“Pruif nou mor!” ropt Francesco as hai heur zunege gezichten zugt. “Kiek, zo dust dat” en hai gait de grieze vloeistof in ain klók noar binnen.
t Zugt der nait uut, dat drankje van Francesco. Mor t smoakt meroakels goddelk. Fris bitterzoer as daauw, veumirregdook in bossen en wiede deurzichten van Westerwolle. As vrouge veumirregdook smoak hebben zol, den smoakt dij zo. Fantastisch dat Francesco dij smoak zo krek noamoakt het. Elk en aine wil nog wel zo’n gloaske bie de kovvie. Lieneke loat zok nog altied nait omproaten.
Mit de lekkere noasmoak van t drankje in de mond goan zie weerom, elk en aine noar zien aigen waarkploatse. Deure staait los, t wachten is op d’eerste bezuikers. Dij kommen, want der is goud folderd, rekloame moakt. Lieneke hait heur welkom, laaidt bezuikers langs de waarkploatsen. Mor woar binnen d’aandren?
In de waarkploatsen, winkel, kovviekoamer: naargens binnen d’aander vaaier. Heur kovviekopkes stoan nog noast de lege gloaskes mit n boomke gries der in. Zie vuilt dat aine heur op de scholder tikt. Lieneke kiekt om zok hin: gain aine. Dit is wol roar. Mor goud, zie mout bezuikers rondlaaiden en dat dut zie zo goud as zie kin. Zie vertelt over de klokkenmoaker, herberist, körvenmoaker, likeurstoker. Verzint mor dat zie zaik binnen, heloas verhinderd en zo. Aalgedureg vuilt zie dat aine heur op de scholder tikt. Mor zie is te drok mit de bezuikers om doar notie van te nemen. Zie maarkt dat dij toch n bietje teleursteld binnen. Zie moakt ter mor t beste van, laaidt de bezuikers rond, geft antwoord op al heur vroagen.
t Was n steveg braauwsel dat Francesco stookt haar. Tot noa sloetenstied blieven de vaaier aandern onzichtboar en onheurboar. Zo tegen haalf zesse zugt Lieneke de figuren langzoam aan in t zicht kommen uut de Westerwoldse veumirregdook. Eerst nog als voage stille gaisten, mor aan t ìnde binnen Frits, Ariadne, Luitzen en Francesco weer hailndaal weerom en heurt zie ook wat dij zeggen. Gelokkeg is der mörgen nog n open dag. En den is elk en aine weer prezent. Zunder draank op.
