Stemmen heuren

Heemker Akkerstroade, dokege winterdaag. Laang en recht verdwient hai in niks. Jumbo zai k nog nait ens. Recht as n stroade fiets ik. Kiek in t veuren, nait bezied. Wol gainaine zain.
Op schoakclub zit ik. Zoaltje in Wilpskaamp. k Konsentreer mie op mien toukommende stek. Achter mie heur k ze proaten. Sie proaten over mie.
“Dij klootzak. Zai hom noe zitten. Dinkt dat hai hail wat is. Slechte slaif, loat hom mor in de stront zakken.”
Dat steurt mie. Eerstens loat ik t geworden. Sie holden wol vanzulf op. Mor nee, sie goan deur. k Stoa op, loop noar veurzitter, dou mien beklaag. Dij veralteraaiert, gaait noar t groepje achter mie. En komt weerom bie mie.
“Dij waiten van niks. Sie haren hailemoal niks over joe zegd Koen.”
Noe ok nog faiten onkennen. k Zel ze leren. Aandermoal zit ik bie mien schoakspel. Zet mien mobiel op geluudsopnoame. k Zol bewiezen dat zai slecht proaten willen over mie.
“Kiek dij suvve ekkel doar noe zitten. Asof hai Bobby Fischer is. En din ok nog soezen dat wie doar wat van zeggen. Soesklot.”
Nuver. Dat staait in mien tillefoon. k Aandermoal noar veurzitter. Loat hom opnoame heuren. Hai luustert, kiekt mie vrumd an.
“k Heur niks an dij opnoame Koen. Nait dat aine slecht proat over joe.”
Gaait hai noe ok nog zeggen dat t nait woar is? Vergreld loop k deure uut.
Thuus luuster k hom nog ais of. Wol veul ruus, achtergrondlewaai. Mor ok dij stemmen en wat dij zeggen over ekkel, Bobby Fischer, soesklot. Dudelk wol.
Komt mail van veurzitter. “Beste Koen” -en din woarschaauwen over mien gedrag op schoakclub. Wol gekverdikke, hai geft mie schuld in stee van dij jongs. Dat vuilt bitter, mor k loat mie nait kennen. Weerom op schoakclub konsentreer ik mie aandermoal op toukommende stek.
“Kiek hom noe ais an. Doar zit hai weer, gloeperd. Ons vaals beschuldegen. Hai kreeg n woarschaauwen mor goat gewoon deur mit zain woanideen. Zaik feguur.”
Geluudsopnoame aandermoal op mien tillefoon.
Noe is t genog west. k Vlaig ophoog.
“Hee Koen, is der wat?” Veurzitter is al bie mie, wol mie muiten. Hoagels knovvel k hom vot, run op groep òf. Middelste jong kriegt mien vuust in t gezichte. Zo, dat haren ze verdaind.
Buten aandermoal Heemker Akkerstroade dij in dook verdwient. En k fiets en k fiets mor deur, kiek zo recht as stroade. Mor van Molenplaain òf komt busje met opschrift ‘Haandhoaving’ noast mie rieden. Van binnen uut kieken twij BOAs mie aargwoanend an.
“Meneer, wie haren melden over joe ontvaangen.”
k Geef mien identeteitskoart, dij voeren hom in. Verder zwieg k. k Haar niks onmis doan, t is heur verdainde loon. Dij kinnen beter achter dij naskende vaailegelaanders an goan in t centrum van Ter Oapel.
Aanderdaagsmörgens is t nog aaltied gries en dokeg. Onbekende man belt an. Sozioal psichioatries verplaigkundege van Lentis. Hai haar melden over mie ontvaangen. Duudt omstandeg uut wat akoestiese woanen binnen. Joe heuren dingen dij nait doar binnen. Wat joe heuren is dikmoals narreg, oakelg. Lentis kin mie medezienen geven dij woanen dempen. En begelaiden.
Wat haar dit mit mie te moaken? k Haar bewies, loat hom opnoames heuren. Hai luustert en kiekt mie din ok weer zo vrumd an.
“k Heur niks. Wol veul ruus, achtergrondlewaai. Mor gainaine dij slecht over joe proat.”
En doch is t zo. Dij haren slecht over mie proat terwiel dat k doar zat te schoaken. Mien aigen oren kin k wol vertraauwen. k Ben nait maal. Woord veur woord haar k t verstoan. Woarom geleuven dij mie nait?
Rechter geft mie veurwoardelke machtigen. Dat is gewoon thuus blieven, wol medezienen van Lentis innemen en kommen op heur ofsproaken. Dat dou k din mor, loat heur mor proaten. Verder hin veraandert niks.