Boukje
Nuigen veur zoveulste Coronaprik wordt op 5 oktober inwisseld. Dat wie doarveur noar Schippersstroat in Veendam raaizen mouten, vin k nait slim. k Heb nooit in dat achteròfstroatje woond, mor der liggen onnuimelk veul voutstappen dij’k doar in loop van joaren hìnlegd heb.
Vergeten herinnerns, dij bie opensloagen van achterdeur van nummer 30 as n wilde stroom over mie hìn kobbeltjeboien. Achterdeur is noa 40 joar nog dezulfde, ain blik in lege roemte is voldounde om te waiten datter niks hail bleven is van onderkommen van lokoale radiozender Parkstad. In n poar tellen heb k t komplete binnenwaark omtoverd noar hou t ais was. Links ploatenhok, in hörn achterin studio en regiekoamer, woar k ook regelmoateg zat en centroal de grote, gezellege wachtkoamer.
Vandoag tref k ain man achter n (kampeer)toaveltje.
’Dokter,’ vertelt t bordje op toavel.
Zien waark bestaait oet t controleren van vroagenformulier en t zetten van n krul. k Mag mie aansloeten in riege. Wat ooit opslagploats veur ploatselke BB was is veur vandoag omtoverd in prik- en wachtkoamer. k Mis de meziek. Prikontvangers binnen in drij riegen verdaild, priksters op rolstoul mit roltoaveltje schoeven van d’ain noar d’aander om te prikken en n plaistertje te plakken. t Is op snelle zwenkwieltjes toch lopieswaark.
In wachtriege kom k achter n vraauw te stoan mit n boukje in haand. n Stempelboukje, kom k al snel te waiten. n Coronaprikstempelboukje. Vanòf begun jannewoarie 2021, toont zai trotsk. Ik heb zokswat nooit had of kregen. k Bin den ook glad jaloers en as zai langsoam deur t boukje bloadert, vroag k mie òf, woar t fout goan is. Woarom ik t schiere boukje mis.
Noa n twijde controle van geboortedoatem deur n kompjoeterman wist n vrundelke plekaanwiester mie n stoul aan in eerste riege.
k Verneem niks van prik. Nijsgiereg as aaltied krieg k op vroag aan prikster antwoord, dat ik, roeg schat, heur vieftegste klant bin. t Ketaaiertje rust, zoals in begunjoaren, wuif ik vot. k Heb t wel zain doar in dij grote, lege roemte.
Thoes komt onderwaarp op toavel, woarom wie dou, in 2021 nait veur t olderwets boukje kozen hebben. Was der wel n keuze, of bin k dou gewoon op stroom van onzekere tieden akkoord goan mit n Corona-app. Wordst der tegenswoordeg ja mit doodgooid.
Dat mien Corona-app al verschaaiden joaren leden deur wel den ook leegd is, het mie nooit n fozzel schelen kind.
‘Kist t wel weer opvroagen,’ zee schoonzeun.
Mor doar is t mie nait om te doun, k haar zo geern wat tastboars in handen hebben wild.
Dijzulfde dag bin k in t femilie-archief doken en kom tot konkluzie, t zit nog aal in olde deuze: vaccinoatsieboukje van ’52, tandarts-controle koart, olde rapporten en paspoorten, nuim t mor op en dat van drij generoatsies. t Is aal bie mie, onder t mom: ‘Meschain hestoe der nog wat aan veur dien verhoaltjes’ terechte kommen.
Bewoaren van olde documenten geft n gevoul van controle. Holdst regie over de tied. t Is makkelk te vinden ( olde deuze ) en hest zunder wachtwoorden aaltied tougang. k Mout bekennen, dat ik op mien mobieltje en kompjoeter regelmoateg t spoor kwiet bin. Zo bin k vlak noa verhoezen, drij joar leden, oardeg wat foto-mattrioal en verhoalen kwiet roakt. Vot of verdwenen in de cloud, wel t wait mag t zeggen. Of k t echt kwiet bin of dat t aargens verstopt zit in de NAS, n soort van USBstikkie, blift n onbeantwoorde vroag. Nee, t mout in n aandere tied: bleef. Sunt kört bin k gewoar worden, dat haarde schieve, woar t aal op stoan mout, terogge vonden is.
Ik mout hier, op dit stee Carmiggelt weer even oet olde deuze tovern. Hai was n balpenfanaat, het nooit n letter op tiepmesien tikt, mor dou was t ook n aandere tied.
