Aigen belang

Let nait te veul op n aander en moak die nait te drok
Elk het zo zien aigen problemen, zelfs de hounder in ’t hok
Het heurt der gewoon bie, doar kinst niks aan doun
En perbair de aander te accepteren en toon n beetje fatsoun

Van binnen waiten de lu precies hou of het aalmoal zit
Hou komt het den dat der altied weer probleem binnen mit dit
Het binnen voak onbenullige zoaken woarom het mis gaait
Jaloezie en mekoar niks gunnen is woar het voak om draait

Wie huiven mor om ons tou kieken en t is overal ellende
Wat dat betreft moaken de mensen van dizze wereld mor een bende
t Is gain neis wat der vandoag de dag om ons tou gebeurt
Het ging vrouger ook al zo, mor dat hebben joe vast zulf ook wel heurd

Het geleuf, het geld en doarbie bie de macht bepoalen het leven
En der binnen teveul lu dei om een aander hailemoal niks geven
De schuld in de schounen schoeven van een aander is een doagelijks gebeuren
En wie moaken ons soms drok om niks en begunnen direct te zeuren

In bepoalde landen en dat vaalt toch wel hail aarg op
Doar zetten bepoalde lu de haile boudel op de kop
Als doar gain euli of gold zit en doarnoast ook gain gas
Den loaten de rieke landen dei mensen zitten en dat geft toch gain pas?

Zo gaauw het om hun eigen belangen gaait den goan ze vot tekeer
Den worden der vot moatregels troffen en doar goan de soldoaten weer
Zolaank het mensdom bestaait is der altied stried west om macht
En den wordt doar vandoage ook nog begrip veur verwacht

Wie leven noe ainmoal mit mekoar op dizze wereld mit onze gebreken
En den wordt der altied bie het minste geringste noar de aander keken
Wat zol het mooi wezen als wie ook de aander wat meer zollen gunnen
En wat mie betreft maggen wie doar den ook vandoage al wel mit begunnen