Aanwaaidend geluk
Deur gaalmgoaten
boven ien toren
zoesden warrelwienden
ons om oren
Uren kregen
van ons gain kaans
om stil te stoan
Mit begerege sloagen
ien t rond
tong te mond oet
kwakje spij ien voesten
wonden wie doarboven
klokken op
mit rabbelroaden
en koabels
Tegen t teruglopen
waas mit haand en taand verzet
dus praaide t palrad
wat wie wollen:
allinneg mor toukomst
mit wat wizzeghaid
van vrouger
Tertsen van kèrkklokken
klonken om ons tou
en deur noar t Wad
Mien ollu beneden veur t hoes
Moi! schalde moeke Moi!
Doezelgmoakend waas hoogte
van t aanwaaiend geluk
