Oosterhouk

Woar binnen nou toch dij dörpkes
bestopt achter n zwoare diek
zai waren bliekboar overbodeg
wat overbleef is sliek.

Woar binnen nou toch dij dörpkes
en de mìnsen van Oosterhouk
woar binnen nou aal dij hoeskes
zai stoan nog bloots in n bouk.

Oh Oterdom Waaiwerd Heemskes
joe heurden der aaltmoal bie
nou kinnen wie allain blaauwbekken
t is ja doan dus veurgoud veurbie.

Gewone lu haren t ja nuver op stee
n aigen hoes n kou en n ole hìn,
mor zai werden lokt mit gold op snee
veul loater pas kwam t gestìn.

Febrieken kinnen wie ons aan vergappen
t zegt t gaait veur brood op n plaank
mor dörpkes spouken in mien gedachten
wonde plekken blouden wel áárg laank.

Dij lu hebben t nou weer goud op stee
zitten ja in fletten van haard beton
mor dörpkes binnen nóu gold op snee
t liekt wel ombuut zunder perdon