Ie kinnen der mit lezen en schrieven
t Is mie wel wat beste mensen,
k mout van moeke op zwemles goan.
t Is vrachteg eerlieks woar!
k Kin mie wel wat beders wensen,
as mien kop en hoar … vol chloor!
Wat n kulloazie in dat woater,
dat gesputter en meer zokswat.
Aal dij waggels en gekloater
t mokt n mens ja zoempenat.
Woar is dat gedou veur neudeg?
Zwemmen kin k ja al zo laang.
Joa… allenneg mor op t dreuge…
Den in t woater, bin k ja gloepens baang.
Geboren: 1942 in Buunderveen
Woont: op Knoal
Schrift al: sunds 1996 in t Grunnegs
Noa mien ofkeuren as directeur van n grondschoule in 1996 heb k mie as tiedverdrief wat toulegd op t Grunnings. Veur mien klaainkinder heb k n twijtoaleg boukje schreven over n hondje dat oetnaaid was en van aal beleefd. Doarnoa bin k wieder goan mit n boukje over n schouljuvver dij noa n hazzeninfarct in n verleeghoes te laande komt. Heur ervoarens stoan in: “Getwiende droaden”, woar k nog n oetgever veur hoop te vinden.
Nou bin k mien twijde bouk: “Losse flodders” aan t deurplougen om t zoakie wat leesboarder te moaken. t Bestait oet n twintegtaal lösse verhoalen en evenzoveul verskes.
