Ie kinnen der mit lezen en schrieven
Overaal in t verleden
doaglieks om ons tou.
Stil op t heden,
nait meer van nou.
As n zuchtje wind
steekt t smaangs op.
n Speulend kind,
n volen in galop.
Vannijs is t weer stil.
Voak onheurboar,
hèt zulf gain wil.
t Gemis is zwoar.
n Enkeld moal nog
duukt t op,
as n zaachte zog,
aal minder haardop.
Din is t veurbie.
Onwaitend, nait bekend.
Ooit zo stoef bie,
t Grunnegs, zo bemind.
Daarde pries Westerwolder Schriefwedstried 2025
Geboren: groot zaikenhoes Stad in 1953, opgruid in Blijham
Woont in: Dale (Wildervanksterdallen)
Schrift al: vanoaf 1990 of doaromtrent.
In 1997 de Schriefwedstried van Knoal wonnen en dou veur de LOK (Lokale Omroep Kanaalstreek) joarenlaank stokjes veur de radio. Eerst actueel mit: “Hebben ie t ook lezen?” onder schoelnoam Johannes Sems en dou n poar joar stòkjes over “Zwoantje mien laive vraauw”. Doarmit ook op de Lokoale Omroup Veendam, Radio Westerwolde en op RTV Noord west. De Stichten t Grunneger Bouk hèt in 2011 n luusterbouk as begunstegersgeschenk oetgeven mit n selectie van dizze radioproatjes: “n Hail joar mit Zwoantje”. Dizze plazerijen bennen op Dideldom ploatst en bennen op youtube te heuren. Mensen dij nait meer zo goud lezen kinnen, hebben doar veul pelzaaier aan. Doarnoast bennen der ook n keur van aandere Zwoantje stòkjes ploatst. Ook wat recentere biedroagen aan schriefwedstrieden bennen ploatst.
Wieder aandere dingen schreven en veur de radio prezentaaierd, zoas “Derk en Hillie”, soamen mit Riek Meijering en teksten van n koppeltje aander schrievers.
Nou bezeg mit Dideldom.nu, dizze webstee!
