Ie kinnen der mit lezen en schrieven
Bie ons in t veen nuimt man t ain uur,
dij kan ja ok aibels laank duren.
Mor moak joe mor nait overstuur,
den eefkes wiederop het man ok kuren.
Doar nuimen ze t ding gain uur, mor joar,
kin je dat meschain wel verkloaren?
t Liekt wel n roadsel, dat is woar,
mor het bestait doar in buurt al joaren.
As je t waiten, din bin je gain kou,
Din heb je t gehaaim snel roaden.
Het is zien ‘uier’, wait je t nou,
Of het n aander t joe verroaden?
Geboren: 1942 in Buunderveen
Woont: op Knoal
Schrift al: sunds 1996 in t Grunnegs
Noa mien ofkeuren as directeur van n grondschoule in 1996 heb k mie as tiedverdrief wat toulegd op t Grunnings. Veur mien klaainkinder heb k n twijtoaleg boukje schreven over n hondje dat oetnaaid was en van aal beleefd. Doarnoa bin k wieder goan mit n boukje over n schouljuvver dij noa n hazzeninfarct in n verleeghoes te laande komt. Heur ervoarens stoan in: “Getwiende droaden”, woar k nog n oetgever veur hoop te vinden.
Nou bin k mien twijde bouk: “Losse flodders” aan t deurplougen om t zoakie wat leesboarder te moaken. t Bestait oet n twintegtaal lösse verhoalen en evenzoveul verskes.
