Winnerstied
t Zel om en bie september west wezen. t Volk was oareg reur mit inhoalen van hoaver, rogge, waait en gaarst. Bandeg waark en t vruig om n bult waarkvolk. Mien volk muik gebroek van maandewaark. Soam mit zien bruier en de vraauw togen ze mit peerd en woagen noar n kaamp gemaaide rogge, haalfweg n wieke. Voa en moeke reden veurop en stoef derachter oomke en zien femilie. Man ston op woagen en dreef t peerd tot e sikkom mit t heufd in loadbak van mien ol heer ston.
Oomke was bliekboar wat branderg of roppeg in de hoed. Har schienboar woorden had mit moeke de vraauw, den in ainen begon e te bandiezen, woar honden gain brood van lusten. Hij wol en zol n haile zooi dingen, dij k mor nait herhoalen zel. Om n laang verhoal kört te holden, t wer van dij gevolgen, dat e der n knup op dee en in ainen van karre in plomp sprong, omreden dat hai zoch verzoepen wol, was t leven meer as zat en t kon hom aal niks meer verröttekonten. Grootsproak of nait, voa wis nait hou rad e t peerd stoppen kon, sprong van kare en stak zien bruier, dij t swemmen nait machteg was, drijtaander vörke tou. Naittegenstoande zien veurnemen greep dizze dankboar toustoken fertuut en wis kleddernat, sikkom as n verzopen kadde op wale te klaauwstern. t Waark mos wel evenpies wachten, den veureerst mos e vergezeld deur zien helleg wief noar hoes om n dreuge verschonen te kriegen.
Onderwegens har e nait veul proatjes, doar gaf zien wederhelfte hom aans ok gain kaans veur. Heur rabbelkoanes ston gain mement stil. Noa n stief haalf uur kon e oetendelk begunnen de schoven op woagen te kriegen. Toesteg keek e d`haile nommerdag veur zoch oet en bie t schavven ston zien ‘radio’ oet. Mainsttied har e aans aaltied t högste woord mit n bult grappen en grollen. Bie mien waiten het e loater nooit meer n pogen ondernomen om n end aan zien ‘liedensweg’ te moaken. Of zel t allent mor wat maalvreten west wezen? Mor dat dut er ok nait tou. In aalsgeval kregen ze dij weken t koren onderdak in grode schure noast ons hoes in òfwachten van komst van dörschmesien.
Goandeweg werren in loop der joaren ok kinder inschoakeld om de baauw aan zied te kriegen. t Is aaltied maandewaark en somtieds wel es schaandewaark worren. Mor ja, as je bie toeren amperan waiten wat je t eerst of t lest aanpakken zollen, kin vlam hail makkelk in panne sloagen. Oomke het t nog lange volholden, het leeftied van de staarken bereikt en is oetknepen, dou e krapaan twijennegenteg kruuskes achter zien noam har.
