Wied
t Vuilt as n ieskolde vinger dijst opwaarmst. t Kibbert bitterliek, piene dij dwaars deur ziel snied. Kin niks doun. Piene is kawalter. Komt of goat zoas zai t wol. Dat is fantoompiene.
Al hail laank haar k links vief stompen. In stee van n vinger. Noa dat ongelok is t mooi keraaiert. Mor al dij zenen dij doar zitten. Dij aargern zok an t littaikenweefsel.
“Joe mouten leren leven doarmet” zegt dokter. Zien pienstillers hulpen ok nait veul.
Borgmester van Knoal besloet ain woning an Brommelbaarg bie Mussel te sloeten. Veur n tied van drij moanden. In woning haar plietsie hennepkwekerij vonden. Zeuvenenvaaierteg ofsteker, zesteg plaanten.
Bin nou draientaachteg. Vraau is oet tied komen. Woon allenneg in mien huus an Brommelbaarg. Bie mien vol verstaand. Bescharrel alles zulf. Mor dij fantoompiene. En noe ok nog dij afasie. Opains kin k hoast nait meer proaten. Dokter zegt t goat nimmer meer over. Wol k joen goan zeggen, schrief k t op n blad pampier.
Bezwoarlek en minsen vervremden van mie. Dij vinden t muilek as k nait proat. Sommege nemen zuk as ben k debiel of dement. Ben k nait. Mor aal mit aal ben k altied meer allenneg. k Kopschraab doarover. t Moakt mie krebenteg. Ok dat nog.
Pot thee zetten mit wied en opzoepen. Dat moakt kop rusteg. En t waarkt ok meroakels goud tegen fantoompiene. Twai mugge in ain klap. Zulf mien perblemen oplozzen. Haar k altied zo doan. Gloepend duur, dij medezenoale wied. En altied gedou t van dokter lös te kriegen. Kweek mien aigen wied. Allenneg haar plietsie noe mien kwekerie wegroemt.
Noe rompslomps goat ain hail zirkes draaien. Twij sozioal waarkers bezuiken mie, mouten borgmester advezeren. k Mout bie reklezeren kommen. Bie ovvezier van jestietsie. Wat haangt mie boven kop? Klontjegat? Mout k mien huus uut? k Overzai t nait meer.
Noar avvekoat. Dij pakt zoak an veur mie. En achternoa bekeken: t kon minder. Mien woning wordt nait sloten. Allenneg krieg k boute as k nog weer kweek. Dou k nait. Kiek wol uut. Reklezeren is vrundelk. Ok ovvezier van jestietsie dut niks, behaalve as k nog weer kweek. Borgmester betoalt kosten van avvekoat. Dij kost mie gain sint.
Aal mit aal zit k nog altied ainzoam te wezen. Mit fantoompiene. Toch moar noar dokter? Medezenoale wied vroagen? Of noar kovviesjop an Handelsstroade bie t Knoal? Meschain is dij goudkoper? Mout t mor wat meer kosten.
