Widde wereld
n Mens is bie toeren n roar ding. t Is ok nooit goud. As musken en aander vogels sikkom van t dak mietern, omreden ze doar zowat reusterd worren, stìnnen en aimeln lu dat ze noar winter longern. En as t winter der is en snijwind over t laand poest, klagt elkenaine over dij duvelse kolde, dij elks zin om boetendeure te goan ontnemt. Laifhebbers hoalen scheuvels oet vet en kinnen zowat nait wachten ze onder te binnen op krek geliek wat bevroren woaterke ok. Aandern bouken n raaize noar n wintersportploatse um doar lange latten onder specioale stevels te doun.
Doch is t ok hierzoot n aibels mooi gezicht, aal bomen, stroeken, poaden en doaken onder n dik loag snij. n Ploatje geliek n kerstkoart. Wanner je der nait oet mouten, is t aal n lust veur t oog. Ok bie graauwe oavenden en nachten is t meroakels. Aal lochtjes glinsternd in snij. Hier en doar t krazzen van n poar scheuvels in loate oavend.
Mor as je smörgens vroug bie t pad mouten om neudzoakelke brood op plaanke te kriegen, is t votdoadelk n hail aander verhoal. Riedend deur gladdeghaid, terwiel dat woagens links en rechts, veur en achter zoch langzoam sloeren. Gelokkeg ridt elks mit gevuil en verstaand, van dij gevolgen der verholdensgewies enkeld n schietbeetje woagens in slip roaken en n aander n unbedould smokje geven. n Poebel is rad moakt. Oetdeukers hebben t er goud mit. Doch is t slim begrodelk as je joen pronkjewail n zetje missen mouten.
Zoltstreuen vaargt n bult van t waarvolk, dat dag en nacht pebaaiert wegen ies- en snijvrij te holden. Mouten der as n bok op n hoaverkiste overtou om rieders aan loop te holden. Kaggel of klimoatkontrole moakt overuren om passeziers wat deu te holden. Winterbaanden kinnen t gevoar meschain wat indammen, mor t blift n hail gedou, dat dut aan zoak niks òf. t Waarkvolk is blied as ze soavends boetendeure van t hoes weer achter t gat sloeten, vraauw en kinder smokken en vaalse widde wereld boeten sloeten kinnen. t Volk, in t biezunder d’olde garde, blift t laifste thoes bie waarme kaggel. Woagt zoch nait boeten deure. t Is ok ja gain doun achter zo’n schoefkoare. Overhoal ligt in n klaain houkske. Aleer je t in smiezen hebben, lig je dele, as eerste halte richten zaikenhoes om zoch hierzoot te vervougen bie t leger van slagtovvers van winter. t Vaalt veur oldegies, zo as mien persoontje, wizze nait tou om pladde van vouten onder te holden. Gain mens zit ja verlegen om zes weke gips of n roustvrijstoalen ploade in t lief. Mouten mekoar, as Jan Splinter, mor n bedie deur winter helpen. Mit wat verzin is der hail wat meugelk. Leven ons tiedelk levent op eerd ja nait allènt veur onszulf.
