Wat n hobeleko
Prinsjesdag klinkt hail aandounlek. Golden koetse mit Keuneg Willem Alexander, Keunegin Maxima aan boord. t Brengt n bult volk op bain.
Veur dij koetse op batterij kwam, as kedo van Amsterdammers, deden ze de opening van t nije vergoaderjoar te peerd. Keuneg veurop en prinskes doar achteraan. Zel ok best n nuver schaauwspul west wezen.
Doch gaait t haile verhoal aiglieks allenneg mor om sìnten dij regaaiern denkt oet te geven.
Keuneg mag aal ellèn veurlezen. Wat n boan!
Plannen nuimen, dij wizze doch nait oetkomen.
Bosschoppen doun mit n lege knip vaalt ja nait tou.
Leste joaren zit er al nait zo slim veul meer in stoatsbule. Kredietkrises het der n nog veul groter gat in sloagen. Mit mekoar binnen we n bult geld kwietroakt en mit mekoar zellen we tekörten weer aanzuvern mouten. Ministers waiten t geleuf k zölf ok nait recht hou ze t zwikkie weer veuroet kriegen kinnen.
k Las in Jesaja 55 vaars twije: “Woarom wegen joe t geld òf veur wat gain stoet is?” Pebaaiern we bie God in n goud bloadje te kommen deur beden, ovvers, joezölf toutoakeln of je n zet te ontholden van vouer? Woarom willen we ogenschienlek ons Meester zo stommegeern wat geven? Of ist t aal veur t oog?
Terwiel dat Hai geern zugt, dat we mit lege haanden veur Hom stoan, van dij gevolgen God ons van t hoogneudege veurzain kin. Wel zoch niks geven let, het ja schienboar aaltied nog teveul. k Heb n zetje t geteut in Koamer aanheurd. Doar wordt n mens nait lös van. Wat n gezoes! Elks denkt t nog mooier te zeggen as n aander. As ze mor in kiekerd komen. n Toal dat paardie lu oetsloan! “Kopvoddenbelasting”, grovver kin t ja sikkom nait! t Is bie toeren van rötten besnuvveld. n Normoal mens zol zoch doarveur ja doodschoamen. Zo goan lu doch nait mit nkander om. t Liekt woarachies wel n kinderspul! Hou binnen dat soort lu wel in Koamer kommen?
Jan, Pait en Kloas worren ten tenail voerd tot ‘lering en vermoak’, liekt t wel. Vechten schienboar nou al veur heur stoul in Koamer. Grove woorden en schunnege toal, niks is heur te dol. As ze mor opvalen en op duur wat ekstroa stemmen van t volk kriegen.
Echt zeggen hou t aans mout of kin, is der nait bie. Stoan din ok mit mond vol taanden. Man, man, wat n boudel. t Volk kin der gain stoede veur kopen! Beste stuurlu stoan as aaltied aan waal. Waiten t aal, mor kinnen t zölf vervast nait beder doun.
Lu, mit nkander mouten scholders der onder. Gain gezoes meer, mor voloet aan de bak. Der vaalt nog n bult te hemmeln. Wel t veurwoar wait, mag t zeggen!
