Ie kinnen der mit lezen en schrieven
Der binnen zoveule vroagen
Vroagen in joen haart
Vroagen dij wonden sloagen
n Vroag dij je verwaart
Der binnen zoveul vroagen
n Antwoord vinden wie nait
Doarom blieven wie vroagen
En geft t ons verdrait
Elk het zien levensvroagen
En het zien aigen verdrait
Elk gaait deur zien doagen
Allìnt mit zien verdrait
Ik zuik de weg van vreugde
Veur elk mìnselk haart
Veur mien noastes vreugde
Geef aan mie dien haand
Oet ‘De Toal van Mien Moeke’
Geboren op: Hogezaand, 25 meert 1934
Schrift veur: Dideldom en Kreuze
k Bin as Hillechien (Hillie) Tuizenga geboren op t Hogezaand in n aarbaidersgezin. As baby was k al zaik deur n medische misser en k zol dat wellicht nait overleven. Da’s wel gebeurd, mor doardeur was mien haile leven nait gezond. Mor k haar zo n
staarke wil en deurzetten kon k ook. De legere schoul is deur mien zaik wezen nait zo schier west. k Begon al vroug mit schrieven. in mien volwassener joaren was Toon Hermans mien grode veurbeeld en stimulans. Mit mien schrieverij dee k
wieder nait veul, tot ik in de joaren ’90 begon mit t oetgeven in aigen beheer. Doarmit heb k ondertussen dattien bouken oetgeven, woarvan de zeuvende in t Grunnegs was: ‘De Toal van Mien Moeke’. In 2011 is doarvan de 3e druk verschenen. In de Grunneger Schriefwedstried heb k n poar keer n pries wonnen. Ook op mien 82e goa k nog aal deur mit schrieven. Ik traauwde in de viefteger
joaren en kreeg twij kiender. Mien pseudoniem Jil Wildenga is n soamentrekken van mien traauwnoam Wildeveld en mien wichternoam Tuizenga. k Schrief over de dingen van t leven, dat veul te vertellen het.
Bouken:
9 bouken in de rieg ‘Levensfase’ (aigen beheer):
Mijn eerste pannekoeken
De Levenswip
Momenten
Geloof, Hoop en Liefde
Relaties 1 en 2
De Toal van Mien Moeke (2e druk en herdruk, 2011)
Sprookjes?!
Ode aan Toon
Golven der Levenszee
Het leven is een wonder
Zoektocht naar Samen
Geloven in gedachten en gedichten
Priezen:
1e pries Grunneger schriefwedstried 2002
