Vot peerd…!!
Vandoage, de 19e juli 2012 las ik n berichtje in t Dagblad van het Noorden over n olle kerel, dij ze asnog oppakt hebben veur oorlogsmisdoaden!
Dat is de twijde al weer vanweeke… Aine is 97 en d’aander 91!
Het dat nog nut, vroag ik mie oaf?
En den…, even loater: Joa, wis! Zai hebben heur straf ontlopen en dat ken nait!?
Mien herinnerns goan weer trogge in de tied.
k Was n joar of zesse, ducht mie en ik was geern bie boeren.
Maisttieden bie Hinderk Boer, mor ook voak n moal bie Jan Luung op Neitap.
Hai haar net n sedel kregen, dat e zien peerd inlevern mos… (zoas ik mie herinner, haar e dij soamen mit Hinderk)
n Mooi, staark peerd! n Broene mit n bles! Ik mog der soms op rieden! Zunder zoadel… striedewiets der zo op!
Ik vroug hom, of ik mit mog. Dat was hom goud en zo togen wie dij dunderdag soamen op t peerd zittend noar Roon.
Der wazzen wel vatteg boeren mit heur peerd.
k Heb mie ogen oet kop keken en woarschienlek oafvroagd, wat of dij Moffen mit zoveul peerden mozzen? k Haar ook ja nog gain verstand!
Luung kreeg te heuren, wat of e aal doun mos…
In looppas deur d’Heerestroat tot aan de Raiffeissenbank en den weer trogge.
Wat n pracht gezicht, aal dij peerden en wat laipen ze aal mooi!
Dou dat achter rogge was, kreeg e te heuren, dat t peerd goudkeurd was en dat e wel oafraaizen kon!!
Gain dubbeltje kreeg e! En dat veur zo’n mooi peerd!
Ik was des duuvels! Kon al noeit tegen onrecht… en dit sloug veur mie alles!
Hou mouten ie t heu nou binnenhoalen? En plougen? En d mizze over t laand brengen?
k Wait nait of k der antwoord op kregen heb van Luung. Wel zai k hom in mien herinnerns nog mit kop noar beneden lopen en rooie buusdouk aalgedureg aan d’ogen!
Bienoa zeuventeg joar loater wor je der weer aan herinnerd, deur n stokje in t Nijsblad van t Noorden… (sorry: Dagblad van t Noorden).
Zellen wie baide t zulfde docht hebben bie t noar hoes goan?:
VOT PEERD…!!!
