Vledderman

Vledderman n keuterboertje
Woonde bie de meulensloot
Haar n monsterdikke koater
Beet hom altied kukens dood

Doar mout mor ais n end aan komen
Katten binnen ja altied vaals
Zel dij kukenbieter stravven
Mörgen krigt e taauw om haals

Sjoerd zien haalfvolwazzen knechtje
Zee nee boer das hailmoal mis
Om n katte op te hangen
Zeg joe dat zuks kunstwaark is

As wie hom in schuure joagen
Wed dat dat veul beter ken
Vang ik hom in n kunstmisboale
Boeten deur t geutgat hen

Boer de vraauw de maaid en kinder
Elk dee aan de klopjacht mit
Ik wait sekuur zee lutje Gerrit
Woar as onze katte zit

Hai kroop achter kougangdeure
Anchie juig hom der vandoan
Knecht ging mit n kunstmisboale
Boeten veur het geutgat stoan

Mor ze muiken in de schuure
t Aarme daaier stoapelgek
Hai vloog in de hoanebaalken
Mit n voart op t houderrik

Om de knecht n poets te bakken
Nou t nait mit de katte ken
Rolt de maaid n sukerbaite
In de zak deur t geutgat hen

Knechtje haar zien reuze slinger
Want de katte zat in zak
En om de hörn van de mure
Geft hai hom n reuze smak

Mor dij dikke sukerbaite
Staite mit n voart weerom
En net boven op zien hazzens
Treft dat dik gevoarte hom

Steerns mit n steert veur d’ogen
Och, wat haar dij jong n pech
Schraiwend ging e noar zien moeke
Bloud luip onder pette weg

Dou zien moeke aal dat bloud zag
Wur ze witter nog as snij
Luit van schrik heur braaien valen
Midden in de pot mit brij

Buurvraauw kwam ais even kieken
Moeke was zo in de waar
Mainde dat heur laive jonkie
Onder n woagen zeten haar

Katte het mie kraabt en beten
Ik vertel joe dat dut zeer
Deur n roege kunstmisboale
Vang ja nooit n katte weer

Moeke zee dou tegen buurvraauw
En ze keek heur jong op kop
Kattebeet is hail gevoarlek
Ik smeer der ducht mie purol op.

Instuurd deur Luuk Houwing, hai schreef der bie: “Dit laid is schreven deur n kastelaain in Zuud- of Noordbrouk, dizze man haitte woarschienlijk Jan Alting, en was tougelieks ook bakker.”