Verona
I
Kin die gain noam geven.
t Haart is der oet, bie mie,
bie die. Grieze wind
van over t meer. t Duustert
aal vrouger om ons tou.
Wie zetten maskers op.
n Koor van stemlozen
binnen wie nog
dij niks meer zain.
II
Zollen wie der ok bie stoan,
in dit labyrint van laifde?
Smakbekken in poort noar t balkon
woar of Julia zok nait zain let.
Noamen zunder richten; kompasnaald
draait overuren aan haartsloagen.
Wait ik wat of ik zuik? Waist doe t?
