Veraanderde Tieden
Dou k nog zo’n beudel was van amperaan tien joar, kreeg k van mien ollu mien eerste fietse. t Was ducht mie wel n ‘vaardehaandse’, mor doch was k der slim blied mit. Fietse was innertied moakt veur n grode, mor dat mog pret ja nait drokken.
Mos wel wat ‘kontjerekken’, van dij gevolgen mien voa n poar klöskes knupde aan pedoalen, omreden dat e t veur mie te gevoarlek von om mit ain bain maank staangen rieden te goan. Behelpen is ja gain zateten!
Noa hail wat valen en opstoan en n bult swait van mien olden, dij aaldeur omstebeurt – om mie in t gereel te holden – achter mie aan bentern mozzen, kreeg k t schier veur nkander. Was keuneg te riek en vertelde op school honderdoet over mien nijste aanwinst. Hou k aans ok jeuzelde, k kreeg t fertuut nait mit hin schoule om doar ais nuver snakken te kinnen. n Poar kammeroaden wollen dit wonder van vernuft aans wel es mit aigen ogen aanschaauwen en luipen noa schooltied mit noar hoes. Vanzölfs mos k dij jongs evenpies zain loaten, woar mit k mien ‘twijroader’ tou in stoat was. Elks wol t ok stommegeern n moal pebaaiern, van dij gevolgen k zölf as n haalfmale achter mien aigen fietse aan bentern mos. Aal mit aal was t n schier dieverdoatsie!
Noa n poar ketaaier kwam der n end aan de veurstellen. Dou dikke Jan, as leste, zien bain over t zoadel sluig, brak stange van fietse middendeur en smakde Jan haals over kop over t stuur. t Jong kwam der mit n poar schramkes nog oareg nuver óf, mor mien pronkjewail was volsloagen noar zien barrebiesies.
Goie road was duur. k Kneep hom as n olde daif dij zoch mishad har, veur d’haanden van mien ol heer. Gelukkeg kreeg Berend n meroakels idee. Zöchde en kreeg n bongel en mit verainde krachten, pien en muite, wozzen we hom in stange te frokseln. Hail verzichteg zetten we t zwikkie in schure. t Fietsen was eerste tied doan, tot neefke Geert om n bosschop mos en mien trots oet schure kreeg. Geert kwaam nait wied! Elks kwam der overtou. Zölfs mien olders zagen spikanteghaid der wel van in. k Bin in aalsgeval n pak kontjeloage mislopen. Geliek kwam der zo n end aan de keukelderij. t Het aans wel n haile zet duurd, veur en aleer k ‘nije’ betere fietse kreeg. Tegenswoordeg kin elks zoch n fietse aanmeten loaten, woar e joarenlaank plezaaier van het. Noa de ploffietse en de Spartamet kin n mens zoch nou zölfs n elektriese fietse kopen, as t trappen hom te swoar worren mog. Veur elks wat wils. Tieden hebben ok hierzoot nait stil stoan.
