Veenbraand

Noa nadde kwakkelwinter is lente laange en körkdreuge. Nat is de grond uut daampt in dook en diezege horezonten. In stee doarvan stoeft dreuge grond op in geelbruun mot. Wie vinden dat op ons kezienen. Gras is soor, gruppen stoan dreuge, niks ontkiemt nog. Elkain hoopt en bidt dat t noe indelk regenen gaait. Mor t blieft körkdreuge.

Op t Knoal gaait t aal zien gebeurleke gaang. Joarliekse aanslag gemaindelke sinzen wordt verstuurd. Dit joar is dij ekstroa hoog deur stegen kostens, infloatsie, enzoveurt. Börgers reageren hoagels: t is al zo krap en den ok nog dij hoge aanslag. Vergrèlde mìnsen bie t loket, vergrèlde tillefoontjes, bezwoarschriften. Mor regels binnen regels, dit het gemainteroad zo vaststeld. Sinzen mouten betoald worden.

Op Gagelweg kommen slieren swaarde rook maank stroatklinkers omhoog. Ok op Dopheideweg, t Moorke, Wolverlei braandt t under de grond. Vlokken benaauwde rook blieven haangen, worden smook. Veenbraand zoas vrouger, dou t veen der nog was? Braandweer komt, spoit stroaden goud nat.
Mor t helpt nait. Veenbraand blieft woulen, rook waalmt aalderwegens uut de grond. Noe ok in Geert Teisstroade, Meulenstroade. En in Parkwiek. Overaal spoit de braandweer mor t moakt gain verschil. Baanden van autos verschruien en plovven van hette. Mìnsen kloagen over heur toenen, woar planten swaart verkoold dood liggen, schutten smeulen en zien vouten verbraanden. Braandweer spoit, t helpt nait, grond blieft smeulen.

Crisesberoad in t gemaindehuus. Gainain wait d’oplössen. Aalderwegens hangt loage smook. Lu geven restveurroad mondkapjes van covidcrises uut. En mìnsen binnen vergrèld dat gemainde niks dut. Heur mit ellèn zitten loat.
Nestor, t laangst zittende lid van gemainderoad, is olde manskerel. Hai het Philips kommen en òfraaizen zain, en het as jonkie nog de veenbraand mitmoakt. Hai zegt an elkain dij hom heuren wil dat t de woede van börgers is over dij hoge sinzenaanslag. Dij woede is de grond insloagen en doar ontbraand. Gainain luustert noar hom. Hai is al old en zel wol dementeren. Bie toukommende verkaizens mouten wie hom mor op n onverkaisboare stee zetten.

Mor ok gainain het n beder idee. En tied dringt: aal dij schoa, kaans dat pvc buizen in de grond smelten, Glasvezelkoabel dij net overaal legd is. Aandre koabels mit kunststof mandel.
Börgmeester hakt knobe deur. As tegemuidkommen in schoa en ongemak dat de veenbraand òfgeven het kriegen aal börgers ainmoaleg kwietschelden van heur aanslag gemaindelke sinzen. Mit luudsprekerwoagens wordt t aalderwegens op t Knoal omroupen.
Tou elkains verboazen is veenbraand aanderdoagsmörgens verdwenen. Braandlocht en smook binnen votwiedeld. Knoal is weer krek zo rusteg as t was. Haar dij nestor den doch geliek?