Vandoag, mien vrije dag
Vandoag n vrije dag
niks mout, aal mag
tillefoon…, mit vroag
hest ook drok vandoag
mien vrije dag
aal mout, niks mag
hest eefkes tied?
k was krekt zo blied
mit mien vrije dag
ais mit aner dingen aan slag
haile dag waark doan
dij bie aner op pampier stoan
mien vrije dag, muid in bainen
enkels vuilen as stainen
nou zit k in mien luie stoul
n vrije dag zo as ik t bedoul
vandoag haar k n vrije dag
niks mout, veur elk aan slag
hest ook drok vandoag?
wat n roare, roare vroag.