Twitterlaid

Op twitter gaait aaid t leven deur.
Gain vekaansietied, of te veul snij,
haarstblad al op rails in leste zummerdoagen
as eerde beeft woar ook in wereld
twittert t twittervolk om t haardst
om t slichte leven even te vergeten.


Piene van doezenden aandern
in aal hörns van blaauwe
planeet blödt leeg in
140 taikens
is nait veul meer
as 140 taikens.


k Heb ze wel ains zain
op stroomdroad in Miami,
de mocking twitterbirds
op heur gemak
laagden ons oet,
scheten ons op kop:
wie betoalen ja gain copyright,
steken laiver kop in t boegende raait,
mit aal ons woorden en taikens
loaten wie boudel
schier op ons beloop.
Wie twittern nait,
wie worden twitterd.

Meer van t zulfde:

0 0 stemmen
Schier?
Berichtje bie n nije reactie?
Stuur mie n e-mail bie
0 Reacties
Inline feedbacks
Bekiek ale reacties
Achtergrond info:

Rieks Holtkamp (Zuudloaren 1950) is dichter en journalist.  
  
Zien Nederlandstoaleg waark is publiceerd ien de Poëziekrant en ien bloumlezens. Zien Grunnegstoalege gedichten stonden ien Krödde, Kreuze en op Oader.
 
Ien 2017 verscheen ‘Zied aan zied’, n dubbelbundel soamen mit Hanne Wilzing.

E-mail bie wat nijs?