Tripel

Over de Diek is de noam van t streekje boerenploatsen laangs d’olde laaidiek in jegend van Jipsenhuzen. Kört bie grinze en uut d’heugte kieken Duutse windterbines tou.
Braauwerij Westerwolle is in aine van dij boerenploatsen vestegd. An butenkaande n aaldoagse boerenploatse. Mor de swienenstaal op t achteraarf wur ombaauwd tot n jechtege bierbraauwerij. Voader en zeun Verweij moakten doar uut heur hobby n bedrief. Uut kloar bronwotter en natuurleke gaarste, hop en molt braauwen dij n dezien verschaaidene bieren. Op n aantal punten in de streek te koop as Westerwolds bier.
k Kais heur Tripel uut. Bier dat braauwen is mit drij moal zoveul molt. Dat moakt ok t hoger perzentoasje alkohol: acht en n haalf perzent. k Schink in en koperblond geurt t bier mie tegemuide van under n dikke schoemkroage. Krudeg. Al bie d’eerste klòk nimt Tripel de macht over. Dij krudege gaarstsmoak zet zok vaast in mien verwulf. Hai blieft mie vaastholden. Smoak wordt langzoam noasmoak, veraandert zok in zokswat as schruiend zwaart rubber. Dat heurt smirreg an mor is t nait. t Blieft smoaken, k gif mie over en smoak blieft mie vaastholden. Zoest nog laange noa in mien haalsgat.
As t fleske Tripel leeg is blief k loi achter. Voldoan in mien lebbe en n bietje zwevend op vlokkege gaarstwolkjes. Recht doen moakt dit bier mie nait: gain koppiene, gain koater. t Is netuurzuver, zunder chemekoaljen. Dus dit bier waarkt meroakels nuver uut mor ok hail zaacht en benoastenbie onmaarkboar. Der is hailndaal tevredenhaid. Best wol n mooie ervoaren.