Tena-lady
k bin nou n bekende dichter
mien vattiende bundel is net oet
en guster waas ik weer op TV met snoet
din liek ik ook nog ais op George Clooney
dus heb aaltied kovvie kloar
veur de wichter dij veur mien klaidkoamer wachten
op mien handtaiken of n geboar
op t tenail goeien vraauwen onnergoud noar mie tou,
ook zowat maals
maisten binnen aal wat older
en goeien mie gain leutje tanga’s noar de kop
mor grode heupslips en lest haar ik zulfs n step-in om haals
t is mor goud dat korsetten oet de mode binnen met heur riegen
en over t gevoar van tena-ladies wil ik verder zwiegen
