t Jonkje in mie
t Jonkje in mie het zo zien aigen leven. Sleudelbewoarder van n geweldege schatkoamer, stampvol herinnerns. Jonkje trekt der geern op oet. Hoge schounen (Bata? Van Haren?), körde boksem aan, swaarde jopper as t aan vrizze kaant is. Ho, eerst even voetballen mit Derkie de Boer op swaarde loane, dat ziestok in woningbaauw van Midwolle. Ochut, der is net wotterlaaiden aanlegd, der zit n bult op weg noa t dichtgooien. Kinstie de nek wel over breken. Mit zien swaarde fietse van onbekind maark (in mekoar knuterd en movveld deur fietsenmoaker Oadam Timmer) komt jonkje nog wel es in hege. Of onnersteboven as ain van de klözzen om trappers hìn tegen bult op weg aankomt. Stonnen trappers glad verkeerd. Leren gaait asmits van ‘Au!’. Jong het sikkom aaltied schonnen knijen, of en tou plaaisters derop. En schonnen neuzen van schounen… Hai trapt ja overal tegenaan: stainen, deuskes, blikjes, balen….Hai mout deurdeweeks zien klompen aan, slieten schounen nait zo gaauw (mor ze worden wel net zo snel te klaain, zien tonen stoan der nou nog noar….). Joa, hai muik n moal op schoulplaain n male schoever mit dij klompen. Onnersteboven, bainen locht in. Ain klompe vuil dele, op zien kop, weer n boele… Klompen kwammen mainsttied nait oet winkel, mor bie Baarghoes vot. Wazzen staarker, benoam as der stokken leer onnerkwammen. Ofval van schoumoaker Smid oet Oostwold. Even n baandje over de klompen, wazzen ze hailendal ‘shockproof’…. Ainmoal haar e doch n poar klompen oet winkel, wazzen mooi opvaarfd. Grootsk stapde doar mit deur woningbaauw, tot kappe derof vloog, van ain van dij klompen. Niks weerd… (“Rötjong, wat hest nou weer ommaans had??!!”)
Voetballen dee e t laifst, mor of en tou gingen ze deropoet, noar t laand van Botjes, veur t jonkje was dat hail wied vot. Derkie ging ook wel ains mit, as e mog van zien moeke. (Moekes haren voak hikhakkerij, mor der wazzen ook wel tieden van vree…) Jonkje kreeg dìn n lutje vleske mit, beetje melk en veul wotter derin, mit n dropke (katjesdrop). En dìn mor schudden, schudden en nog ains schudden…. Dropwotter, lekker! Wotter lopt hom nou nog wel ains in mond, mor t wordt nooit meer as dou… Ze speulen ook wel boeten bie d’oprit noar achterdeure (veurdeure wer nait broekt, n domie kwam der nait meer in hoes). Veul speulgoud haar e nait, wel veul fantezie, verbeeldenskracht. Haar e n moal n brandweerwoagen kregen, op Sunnerkloas, of veur zien verjoardag. Ree ain van dij Eversbungels mit zien veurrad van fietse derover hìn. Indeukt, nait meer recht te kriegen, ook nait deur haard te reren. Doarboeten bie achterdeure kwam ook de reuzenstoompot te stoan, mit swieneerappels. De kunst was om doar nog n poar oet te peutern mit n stok, as ze sikkom kloar wazzen. Oetkieken dat je vingers nait verbranden deden. Bedeln om n luddek beetje zolt en dìn mor smullen! (Swiene huifde ja nait alles, wer doch slacht in november deur de Hassings, pa en zeun). Jonkje het nog veul meeer herinnerns aan dij joaren doar aan Blaauw zien loane. Hoesnummer E53, loater Schortinghoesloane 11. t Hoeske, achterin toene, mit de kepot scheurde kraanten om joen gat mit of te vegen. Asmits wer der n emmervol stront bie de rebaarberplanten gooid, wollen ze beter wazen, dikkere stelen. D’olle appelboom, Bremleys, zo zoer….. Veur appelmoes. Pa at t zo, wie mozzen der hail wat suker in van de Coöperoatsie. Toentjen dee t jonkje ook. Ging e laandjebloumen oetsteken in t gruinlaand bie Botjes, mit grond deraan. Ging e ze weer poten in zien toentje, stoefbie de sering en gulden roede. (Haren ze doar gain Grunneger noamen veur?) Zoien in schure… n Tent moaken van t grode rik… In hoes bie maal weer postbode speulen mit ansichtkoarten… Meccanodeuze op toavel… Op veziede bie oom Engel Tuun aan overkaande, op zundagmörgen of op gewone doagen, boeten op baanke… Oom Engel mit zien boggel, en zien sloatje… Op neuze derbie, in open deure van garage Blaauw, kieken noar auto’s, trekkers, monteurs…..
t Jonkje in mie… Och, wie hebben t best gezelleg mit ons twijbaaident!
19 oktober 2011