t Aimerke en de Mieghommel
t Aimerke en de Mieghommel wilden wel ains goan stappen,
mor t Aimerke; (hierin was hai din wel wat rapper),
wis wel woar hai hìn wol goan;
noar de daaier-disco wel te verstoan!
t Aimerke haar hierin gain keur.
Hai vruig: “wat stelst doe die doar bie veur?”
“Ze loaten mie nog gainains noar binnen,
wat mouten ze doar mit mien formoat begunnen?”
Toun ze bie de disco aankomen waren,
kon t Aimerke zuk amper haarn.
De oetsmieter was bepoald gain leutje drommel,
t was ain Keunens-Mieghommel!
Hier haar ons Mieghommeltje wel ogen veur,
en zee tegen t Aimerke: “loop doe mor deur,
goa doe mor gezellig daansen,
din blief ik hier wel lekker sjaansen”.
Zo zegd, zo doan, t Aimerke ging zien gaang,
want hai was haildaal nait baang.
En dou hai op daansvlouer was aankomen,
zag hai n Aimerke, en mos zuk intomen.
Mor toun t aal wat loater worden was,
hulp de Keunens-Mieghommel heur in de jas.
Ook t Aimerke kwam juust aansneld,
en vuilde zuk n haile held!
Ook hai was op daansvlouer zwicht,
veur ain oardeg Aimerke-wicht!
Mit n kander binnen ze toun noar t bos tou goan,
genougelk slenterend in t licht van de moan!