Swartje
Gezienus zien zeuntje haar n knientje, dij e ais op rommelmaarkt ien t dörp kocht haar veur n kwartje. t Was ain van twij jongbaistjes van zès weken old en t jong was der wild op west. Dou e bie zien moeke gain geheur von dou hai hom kopen wol, gaf e t nait op en zeurde zien pa net zo laank aan kop dat dij tou gaf. Dij von t aargens zulf ook wel schier dat t leujong n daaier hebben wol. Hai mos pa wel touzeggen dat e t baist zulf vreten geven zol en ook oetmizzen. Nou, dat was vanzulf votdoadelk touzegd. Moeke zee nog tegen Gezienus dat e der mor op reken mos dat hai zulf veur t daaier opdraaien zol. Mor handel ging deur en t jong was eerste doagen aalvot mit t baistje ien tril.
Knien kreeg Swartje as noam, omreden hai hailendaal swaart was. n Aander jonkje oet t dörp kocht t aander baistje, mor dij haar t ter noa n poar moand al tou doan. Opa timmerde n hok veur Swartje en noaber dij der ook zien slinger aan haar, timmerde n goazen ren ien mekoar.
Eerste doagen waren der gain aksies, mor dou t hok oetmist worden mos, wer laifde van t jong al wat minder groot. Dat haar e ja nooit docht, dat dij boudel zo stinken zol en toch wel slim smereg was, mit dij jier en keudels. Mit n greep mit laange stoal en mit ol heer zien waarkhandschounen aan werd klus toch kloard, mor t duurde al nait laank meer of Gezienus draaide der zulf veur op. t Jong mos net hoeswaark moaken of net n bosschop doun of voetbalen, aaid krekt as t weer tied van oetmizzen was. Ook mos pa aal voaker vroagen of jong t knien wel vouerd haar.
As Swartje boeten was ien ren ien summer was t gain dorie; nait veur t vouern en nait veur t missen. t Knelpunt laag hom veuraal ien wintertied as t baist onnerdak was ien t achterhoes. Mor t jong was der wieder nog altied wies mit en speulde voak mit Swartje. Hai hoalde hom den oet ren en knien kon vrij deur toen strunen. Of en tou verswon t baistje wel ais tussen stroeken, mor hai kwam altied weer luchteg springend terug. Ien tegenstellen tot zien bruiertje werd Swartje older en older. t Jong ook vanzulf en dij kreeg t ook drokker mit voetballen en mit leren, zodat Gezienus aiglieks hailendaal veur t baist opdraaien dee. Hai haar t er wel ais over dat t baist op n duur mor vot mos, dou Swartje older wer en nait vanzulf dood ging. t Baist was op n duur al n joar of aacht west en nog zo sond as n vis ien t wotter. Mor dou ging knienezaikte rond. Jong zat veur t eksoamen dou Swartje zaik wer en kop vol swelderij kreeg. Ogen waren haildaal tou. Pa docht dat t knien mor òfmoakt worden mos om oet lieden verlöst te wezen, mor dat ging jong en zulfs moeke veul te wied. Nee, t baist mos en zol noar veearts om kieken te loaten of der wat aan te doun was. Jong mos vanzulf hoeswaark doun; moeke zee dat t pa zien toak was om mit Swartje noar veearts te goan en doarmit was t beslist.
Zodounde zat Gezienus op n oavend noa t waarm eten mit Swartje ien n deus op knijen bie veearts ien wachtkoamer. t Ging der doar nuver om heer. n Dikke herder haar krekt n kat gedienen ien jagd. Kat was oet t kooike van boaske ontsnapt en herder zol kat wel even mores leren. Kat kon zuk net op tied redden deur ien gerdienen te klimmen. Noast Gezienus zat n jongemaaid ook mit n kat ien n ketonnen deus op schoot. Deur t gedou mit herder was dij kat ook van streek roakt en plasde ien deus. Ie roaden t al. Natte bodem viel der onneroet en herder haar twijde kat ook gerdienen ien jagd. Gezienus hiel deus mit knien op knijen goud vaast, din boas van herder zat liek tegenover hom. Snoet van herder kon hoast bie deus mit knien der ien kommen en hai rook knien vanzulf. Hond dee niks aans as noar deus tou snuffeln mit oren recht ien t ìnd en hail begereg kiekend.
Gezienus docht ter aan hou t eertieds ging dou hai nog thoes wonen dee bie ollu op ploats. Dou kwam t regelmoateg veur dat der n daaier zaik wer en t ter tou dee. As t slim was, werd der n haandje bie holpen. Nou mos je votdoadelk noar veearts, den daaier waren net kiender veur lu. Hail even mos e , ondanks herder dij aal mor driester wer en ook al begunde te likkeboarden, hoast kniezen, tou e om suk hìn keek noar aal dij börgerlu mit n zaik baistje, dij zo verdraiteg keken. Ainege oetzunderns waren katteboazinnen dij hels waren op boas van herder en zulf ook hoast bloasden van verniendhaid, dou zai katten weer ien deus of kattemaand haren.
Boas van herder trok hom der nait veul van aan. Zee enkeld mor dat hond broaf was en niks dee. Hai hiel hond net kört genog aan lien zo dat dij net nait bie deus van Swartje kommen kon.
Gelukkeg was herder t eerst aan beurt dou veearts wachtkoamer ien kwam en hail even noar gedientjes keek veur t roam. Dij hongen der wat vrumd bie. Dou herder vot was begonnen lu aalmoal te koakeln as dat t n schaande was dat zuks wat mit laive poeskes gebeuren kind haar, mor op t lest zat Gezienus nog allain mit Swartje ien deus ien wachtkoamer. Dou veearts hom raip en knien zaag, prakkezaaierde en mommelde dij wat. Dou kreeg e n spuit en zee dat e t knien n spuit geven zol, en dat as t daaier aanderdoags nog leven zol, hai nog zo’n spuit hemmen mos. Òf Gezienus ter veur over haar, vroug e. Aans kon e t knien ook wel iensloapen loaten, den veul hoop haar e nait. Denkend aan ellèn en verdrait as e zunder Swartje thoes kommen zol, zee e dat hai ter op woagen wol.
Knien kreeg dus n spuit; ging weer ien deus en op hoes aan woar belangstellen groot was en ook opluchten dat Swartje nog leven dee en veearts der wat aan doun kon. Gezienus zee dat e volgende dag weer hìn mos veur vannijs n spuit. Hai vertelde der mor nait bie dat veearts zegd haar:” As t knien den nog leven dut”.
Mor Swartje zat aanderdoags nog rechtop ien zien hokje en Gezienus der soavends weer mit hìn. t Jong mos vanzulf noar voetbaltrainen, dus dij kon nait mit. Gezienus haar wel n wat steveger deus opzöcht dit moal, mor herder was dij oavend nait ien wachtkoamer. Twij katten wel weer en dij waren nou toamelk trankiel. Gerdientjes hingen weer recht. t Knien kreeg vannijs n spuit en veearts zee dat e t nou wel redden zol mor dat e over twij doagen nog n leste spuit hebben mos.
Swartje klunderde aal wat op en noa drij doagen het Gezienus leste spuit hoald. Hai haar ientussen al wel heurd dat t dure spuiten waren – wel twij tientjes t stuk- dij veearts zaike daaier gaf en noa leste spuit vroug Gezienus veearts den ook wat benaauwd hou groot òf schoade was. Hai keek Gezienus aan en zee: “ Dou mie mor n tientje den k vind t ja zo geweldeg dat ie aal mor weer kwammen mit zo’n zaik baist veur dij zien leven ik nog gain dubbeltje geven haar en woarvan k noa eerste spuit docht haar dat k joe nooit weer zain zol mit t baistje”.
Swartje was der n zetje loater weer haildaal bovenop en was deur goudkope spuiten toch zo immuun worden veur ale zaikten dat e, zond en wel sikkom zestien joar old worden is. Gezienus het der dus nog joaren waark aan had, mor zo slim von e dat nou ook weer nait.
Aiglieks dee hai t ol baistje, dij e ien toen begroaven het, slim missen noadat e t zoveul joaren verzörgd haar.
Zeun is nou traauwd en het zulf n zeuntje. Hai het opa al vroagd of e t knienehok en ren
nog het……
27-08-09