Stofzoeger op leeftied

Ik ben n stofzoeger op leeftied
en roas deur t haile huus.
t Is stofhappen bloazen veur altied
over perket, plefon en plûche.


k Zit vol met zoagsel, blad, naalden
spinnen, mieren, pissebedden en stof.
k Mot er allernoast van kokhaalzen,
zelfs mien boetenkaant wordt dof

want ze sjorren zo aan mien slang,
mien lief schampt vaarf van deurposten òf.
Ik knal tegen toavelpoten en behang,
vlaig den op de sloapkoamers òf.


t Gaait er om weg as ik mien ronde dou,
t is een lewaai van jewelste.
Veuls te voak mot k op sleeptaauw
en k ben al nait meer de snelste.


Noa ofloop van t gebeul
baargen ze mie ien kaast
noast de striekplaank en den is t mis
omdat het nait goud paast.


Mien slang steut tegen kaastdeur,
dij vaalt op slag weer open.
Bie t dichtdrukken krieg ik n nije scheur,
beplakt wor ik deurlopend.


Mor nou zit ik te boalen.
Ik heb t hailemoal had
en zwieg ien alle toalen.
Goa mor om n aander op pad

Oet de bundel ‘Granaatjes met een gouden slot’

Meer van t zulfde:

0 0 stemmen
Schier?
Berichtje bie n nije reactie?
Stuur mie n e-mail bie
0 Reacties
Achtergrond info:

Coby Poelman-Duisterwinkel, geboren in Grunnen ien 1955, woont met heur man ien Aduard.
Ze schrieft gedichten, verhoalen en columns, het 12 bouken uutgeven woarvan 2 kienderbouken.
Heur leste bouk, een kienderbouk is ien 2019 uutgeven deur Kok/boekencentrum.
Ze droagt veur uut aaigen waark veur verschaaiden verenegingen, is vaste columnist bie Welkom in Zuidhorn vanof 2011.
Ze mag groag schrieven over wat heur roakt ien t leven, ze schrieft bie foto’s, bie bouken die ze leest veur de literaire kring.
Ze waarkte meer dan 10 joar met aan biebelse dagbouken, uutgeven deur Jongbloed en enkele van heur gedichten bennen op muziek zet deur componisten.
Ien de Erasmusuniversiteit ien Rotterdam is n deel van heur gedicht ‘Diploma-uitreiking’ deur NEON-kunstenoar Toni Burgering (de kunstenoar die ook de bekende dichtregel van Lucebert ien Rotterdam ien NEON moakt het) ien een Neon kunstwaark verwaarkt en dat beslacht een groot dail van de wand van Sanders Law library woar rechtenstudenten studeren. Dat dail van heur gedicht is ook ien 200 minikunstwaarken graveerd die de rechtenstudenten uutriekt kriegen as ze de bul hoalen.
Bie de opening van Sanders Law library het Coby heur gedicht doar veurdroagen. Doar kreeg ze zelf ook t mini kunstwaark overhandegd.

E-mail bie wat nijs?